ԿԳՆ-ն արձագանքում է ուսանողներին

Կրթություն, գիտություն 19:45 06/05/2010

ԿԳՆ-ն արձագանքում է ուսանողներին

Արձագանքելով այսօրվա ուսանողական երթին` ԿԳՆ հասարակայնության հետ կապերի և տեղեկատվության վարչությունը տեղեկացնում է, որ
հանրապետության վարչապետին հասցեագրված նամակին նախարար Արմեն Աշոտյանը ծանոթացել է ԶԼՄ-ներից:

Տեղեկատվության համաձայն` պաշտոնապես այն դեռևս ստացված չէ: Այնուամենայնիվ, գրության բովանդակության հետ կապված պետք է նշել, որ, իրականում երթի կազմակերպիչները «Ժառանգություն» կուսակցության անդամներն են: Իսկ ինչ վերաբերում է ասպիրանտուրայի և մագիստրատուրայի տեղերի կրճատման խնդրին, ապա կրկին հայտնում ենք, որ կառավարության համապատասխան որոշումներով պետպատվերը մագիստրատուրայում և ասպիրանտուրայում չի կրճատվել: Եթե անցյալ տարի մագիստրատուրայի համար հատկացվել էր 1543 անվճար տեղ, ապա այս տարի դարձյալ հատկացվել է 1543 անվճար տեղ:

Նախորդ տարի ասպիրանտուրայի համար հատկացվել էր առկա ուսուցման 224 անվճար տարկետման իրավունքով տեղ, իսկ այս տարի 122 անվճար տարկետման իրավունքով, ինչպես նաև 247 անվճար տեղ առանց տարկետման իրավունքի:

Պետպատվերի շրջանակում վերաբաշխում է տեղի ունեցել պարտադիր զինվորական ծառայությունից տարկետման և առանց տարկետման տեղերի միջև:

Պետպատվերի ծավալների պահպանման` այն է պետական միջոցներով անվճար սովորելու լիարժեք հնարավորության պահպանման հանգամանքը, կարծում ենք, միտումնավոր է շրջանցվում բողոքի ակցիայի կազմակերպիչների կողմից, որը կարելի է դիտարկել որպես համախոհներին մոլորեցնելու փորձ, որպեսզի չբարձրացնեն տարկետման իրավունքի` Հայոց բանակում հնարավոր ծառայության հետ կապված խնդիրներ և այդպիսով չընկալվեն հասարակության կողմից որպես ոչ հայրենասեր մարդիկ:

Պաշտոնապես վերոնշյալ գրությունը ստանալու դեպքում ԿԳՆ-ն կարող է հանդես գալ հավելյալ մեկնաբանություններով:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: