Ձեր վստահելի աղբյուրը

Սփյուռքագետ Արթուր Անդրանիկյանն, այսօր լրագրողների հետ հանդիպման ժամանակ խոսելով Հայաստան-Սփյուռք հարաբերությունների մասին, ասաց, որ հայ-պարսկական, հայ-գերմանական հարաբերություններն ավելի լավ են, քան Հայաստան-Սփյուռք հարաբերությունները:

Ըստ բանախոսի, առաջին Հայաստան-Սփյուռք հարաբերությունները բարելավող, կարգավորող կամուրջը Հովհաննես Թումանյանի կողմից ստեղծված ՀՕԿ-ն էր (Հայ օգնության կոմիտե): «Մենք Սփյուռքի հետ վաղուց առնչություններ ունենք, բայց ի վերջո չենք ճանաչում, չենք յուրացնում Սփյուռքը»,-ասաց սփյուռքագետը:

Ասուլիսի մյուս բանախոսը, սփյուռքահայ պատմաբան Գևորգ Յազճյանը նշեց, որ միչև Հայաստանում չվերանա կոռուպցիան և մինչև «բյուրոկրատական քաշքշուկները» չհասցվեն նվազագույնի, սփյուռքի հետ հարաբերություններում հետընթաց կլինի: Իսկ այդպիսի իրադրություն, ինչպես սփյուռքահայը նշեց, ներկայում էլ է նկատվում:

«Նույն բանը ասում են Սփյուռքում, ինչ –որ Հայաստանում ասում են գործարարները` նկատի ունենալով պետական մարմիններին. «Մի խանգարեք մեզ, մենք մեր հացը կհանենք, մեր հարաբերությունները կդասավորենք»,-ասաց Գ. Յազճյանն ու ավելացրեց, որ Սփյուռքի հետ կապված օրենքներ են ընդունում, իսկ հետագայում, պարզվում է, որ դրանց մեջ լուրջ բացթողումներ կան:

Անդրադառնալով սփյուռքի նախարարության ընդունած «Հայաստան-Սփյուռք գործակցության զարգացման» հայեցակարգին, բանախոսը նշեց, որ հայեցակարգի մշակման գործում սփյուռքահայերը բացարձակ մասնակցություն չեն ունեցել, իսկ դա, նրա խոսքով, սխալ է: