Ձեր վստահելի աղբյուրը

Ասպիրանտուրայում և մագիստրատուրայում սովորողների համար տարկետման հնարավորության կրճատումը հակասական գնահատակնների տեղիք տվեց հանրության ու նաև քաղաքական ուժերի շրջանում: Արդյունքում մի խումբ ուսանողներ բողոքի ակցիաներով հանդես եկան, իսկ Կրթության և գիտության նախարարը մեղադրեց «Ժառանգություն» կուսակցությանը, որ հենց նրանք են կանգնած այդ միջոցառումների կազմակերպման ետևում:

Արդյո՞ք այդ մեղադրանքը համապատասխանում է իրականությանը և եթե ոչ, ապա ինչո՞ւ է «Ժառանգության» մասնակցությունն այդօրինակ խոսակցությունների տեղիք տալիս` այս հարցերի շուրջ այսօրվա ասուլիսում փորձեցին բանավիճել ԱԺ ՀՀԿ խմբակցության անդամ Կարեն Ավագյանն ու «Ժառանգություն» խմբակցության ղեկավար Ստյոպա Սաֆարյանը:

Ըստ ՀՀԿ-ականի, վերջին իրադարձությունները գալիս են ապացուցելու, որ որոշ քաղաքական ուժեր ցանկացած առիթ օգտագործում են, որպեսզի ևս մեկ անգամ հնչեցվի նրանց անունը: Եվ իր համար զարմանալի ու անհասկանալ էր, որ կոնկրետ այս միջոցառումների հետևում կանգնեց «Ժառանգությունը».

«Բայց ի պատիվ մեր երիտասարդների ու ուսանողների, ուսանողական այն մեծ խմորումները, որ փորձում էին պատրաստել «Ժառանգության» մեր գործընկերները չհաջողեցին»,- ասաց Կ.Ավագյանը` հիշեցնելով, որ մասնակցեցին միայն մի քանի տասնյակ ուսանողներ, որոնք իրենք էլ չգիտեն, թե ի՞նչ են ուզում:

Պատգամավորը նշեց, որ համակարծիք է նախարար Արմեն Աշոտյանի հետ, որը նաև իր ընկերն է, որ այսօր բանակին պետք են խելացի երիտասարդներ, որոնք բանակից հետո միայն կշարունակեն իրենց ուսումը մագիստրատուրայում և պետք չէ սրան քաղաքական աստառ տալ` փորձելով լուծել սեփական խնդիրները.

«Զարմանում եմ, ինչո՞ւ մնացած քաղաքական ուժերը չհերքեցին, թե կապ չունեն այս նախաձեռնության հետ և միայն դուք նման հայտարարությամբ հանդես եկաք»,- հետաքրքրվեց նա Ս.Սաֆարյանից:

Ս.Սաֆարյանը նշեց, որ այս նախաձեռնության մեջ, փաստորեն, ինքնախոստովանություն կա, որ բանակը հասցրել են այն վիճակի, որ հույսը համալսարանի 100 ուսանողներն են: Ինչ վերաբերում է այդ ակցիաներին, ապա ուսանողները իրավունք ունեն հայտնելու իրենց կարծիքը.

«Եվ ես չեմ էլ փորձի հերքել, որ «Ժառանգության» անդամ-ուսանողները ևս մասնակցում են այդ շարժմանը, բայց ի գիտություն ոմանց ` մենք չենք ցանկացել, որպեսզի կուսակցականացվի այս հարցը: Այնպես որ պետք չէ սև կատու փնտրել մութ սենյակում»,- հորդորեց անվերջ իրեն ընդհատող Կ.Ավագյանին բանախոսը:

Բացի այս, պետք չէ «Ժառանգության» ականջները փնտրել ցանկացած նախաձեռնության հետևում, թեպետ երբեմն, ըստ Ս.Սաֆարյանի, իրենց նախաձեռնություններից օգտվում է նաև նախագահ Սերժ Սարգսյանը:
Սա հնչեց ի պատասխան Կ.Ավագյանի այն դիտարկմանը, որ եթե այս նախաձեռնությունն իրոք լավը լիներ, ապա ՀԱԿ-ն այն «իրենով կաներ», ինչպես որ միշտ արել է:

Ս.Սաֆարյանը շարունակեց` ըստ ամենայնի իշխանությունների «վախի դոզան» այնքան է մեծացել, որ ոստիկաններն այդ ուսանողներին սպառնում են ֆիզիկական հաշվեհարդարով, սակայն Կ.Ավագյանը դարձյալ միջամտեց. «Սա հերթական հայտարարությունն է, որի տակ ոչ մի հիմնավորում չկա»:

Ի վերջո, Կ.Ավագյանը հիշեցրեց, որ ողջ խնդիրը միայն տարկետման մեջ է և ոչ ոք չի արգելում, որպեսզի ցանկացողները գնան ասպիրանտուրա, քանի որ տեղերն անսահմանափակ են և առավել ևս շարունակեն ուսումը ծառայելուց հետո: Եվ կանխատեսեց, որ գուցե ժամանակի ընթացքում այս խնդիրն ինքն իրեն հարթվի, քանի որ Բոլոնյան գործընթացում որևէ տեղ չկա ասպիրանտուրա ասվածը.

«Դա խորհրդային միությունից մնացած ինչ-որ մի էտապ է, որտեղ գիտական աստիճան են ստանում, իսկ աշխարհն այլ ճանապարհ է ընտրում»,- հավելեց նա: