«Մեր բանակն այդ գումարտակի կարիքն այդքան սուր չի զգում, որպեսզի այդ պատճառով գլխատվի ամբողջ գիտական համակարգը»

Կրթություն, գիտություն 14:11 10/05/2010

Ազգային նոր պահպանողական շարժման նախագահ Էդգար Հելհելյանն այսօր լրագրողների հետ հանդիպման ժամանակ նշեց, որ իրենք շարունակելու են կրթական բարեփոխումների դեմ իրենց պայքարը: Նա մասնավորեցրեց, որ հարցը վերաբերում է ոչ միայն բուհական, այլև միջնակարգ կրթությանը:

Ասպիրանտուրայում և մագիստրատուրայում պետպատվերով տեղերի նվազեցման առիթով բանախոսը նշեց.

«ԿԳ նախարարությունում դա պատճառաբանում են զորակոչի հետ կապված խնդիրներով, ինչն իհարկե իրական է, որովհետև այս պահին զորակոչային տարիք են մտնում 1992-93թթ. ծնվածները, իսկ այս ժամակամիջոցում ծնելիության նվազեցման խնդիր կար: Երկրորդ հանգամանքը բանակից խուսափելու ռիսկերը նվազեցնելուն է ուղղված, երբ հետբուհական կրթությունն այս նպատակով է օգտագործվում»:

Ըստ բանախոսի, այսօրվա հաշվարկներով մոտ 500-600 ասպիրանտ և մագիստրոս ենք ունենալու, որը մի գումարտակ զինվոր է:

Նա հավելեց, որ մեր բանակն այդ գումարտակի կարիքն այդքան սուր չի զգում, որպեսզի այդ պատճառով գլխատվի ամբողջ գիտական համակարգը:

«Այսինքն մենք կրթվելու իրավունքից զրկում ենք միջուկային էներգետիկայի մեկ մասնագետի, որպեսզի բանակում ունենանք մեկ հրաձիգ: Սա աբսուրդային իրավիճակ է»,-ասաց բանախոսը:

Հաջորդ մտահագություն առաջացնող ծրագիրը Ազգային նոր պահպանողական շարժման նախագահի համար ՀՀ վարչապետի նախաձեռնածն է` արտասահաման ուսանելու մեկնող ուսանողներին ֆինանսավորելու վերաբերյալ:

«Խոսվում է նրանց հովանավորելու մասին, բայց չի խոսվում նրանց հետ վերադարձի մեխանիզմների մասին»,-ասաց Է. Հելհելյանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: