Ձեր վստահելի աղբյուրը

Այս տարվա սեպտեմբերին կսկսվի Իէն Գիլանի և Հայաստանի պետական սիմֆոնիկ նվագախմբի համատեղ համերգի ձայնագրության DVD-ի համաշխարհային վաճառքը:

Ըստ Մեդիամաքս գործակալությունը, այս մասին ասել է ավստրալական Thompson Music ընկերության տնօրեն Դրյու Թոմփսոնը: Վերջին 12 տարիներին նա հանդիսանում է Deep Purple-ի եւ Իէն Գիլանի CD-ների ու DVD-ների պրոդյուսերը:

DVD-ների վաճառքից ստացված եկամտի մի մասը կուղղվի Գյումրիի թիվ 6 երաժշտական դպրոցի վերականգնման հիմնադրամին:

«Նյութը հրաշալի է, Հայաստանի Հանրային հեռուստատեսության նկարահանող խումբը հոյակապ է արել իր աշխատանքը: Աուդիոնյութի որակը նույնպես շատ լավն է: DVD-ի վրա աշխատող թիմի բոլոր անդամները ցնցված են նվագախմբի հրաշալի ելույթից: Ակնհայտ էր, որ նրանք մեծ սիրով են նվագում: Քանի որ ներկա եմ եղել Երևանում այդ համերգին, ապա կարող եմ ասել, որ այդ երեկոն գերող էր բոլորի համար: Ես աշխատում եմ Իէն Գիլանի համար վերջին 12 տարիների ընթացքում, սակայն այս նախագիծը հատուկ է ինձ համար, քանի որ այն ցուցադրում է նրա հիանալի հարաբերությունները լսարանի հետ: Կարծում եմ, Իէնը շատ զգացված էր հայ հանդիսատեսի ընդունելությունից, և դա ակնհայտ երևում է տեսանյութում: Կարծում եմ, որ այս DVD-ի թողարկումը իրադարձություն կդառնա Իէն Գիլանի և Deep Purple-ի երկրպագուների համար ողջ աշխարհում»,- ասել է Դրյու Թոմփսոնը:

Մեդիամաքս-ը հանդիսանում էր Հայաստանի պետական սիմֆոնիկ նվագախմբի հետ Իէն Գիլանի` 2010թ. մարտի 26-ին և 27-ին Երևանում կայացած բարեգործական համերգների կազմակերպիչը: Համերգներից ստացված ողջ հասույթը ($ 45.000) կուղղվի Գյումրիի թիվ 6 երաժշտական դպրոցի վերականգնման հիմնադրամին: Համերգների գլխավոր հովանավորն էր «ՎիվաՍել-ՄՏՍ» ընկերությունը, պաշտոնական գործընկերը` bmi ավիաընկերությունը:

2 շաբաթից Իէն Գիլանը կրկին կայցելի Հայաստան: Մայիսի 25-ին Կարեն Դեմիրճյանի անվ. մարզահամերգային համալիրում կկայանա Deep Purple-ի համերգը, որը կդառնա լեգենդար ռոք-խմբի առաջին ելույթը Հարավային Կովկասում: