Ձեր վստահելի աղբյուրը

«Ազադլըգ»-ի` Սաբիրաբադում գտնվող աղբյուրը հայտնել է, որ Քուռ գետի հեղեղումների պատճառով շրջանի 20 գյուղերի բնակիչները տարհանվել եւ տեղավորվել է հարեւան գյուղերում: Նրանց մի մասը տեղավորվել է Սաբիրաբադի մարզադաշտում տեղավորված վրաններում: Շրջանի բնակիչներից մոտ 30 մարդ աղետի պատճառով անհայտ կորել է: «Շրջանում խիստ աղետալի վիճակ է ստեղծվել: Հեղեղված գյուղերում տնային սատկած կենդանիները լողում են ջրի երեսին: Շրջապատում գարշահոտություն է տարածվել: Ջրի տակ մնացած տները հերթով փլվում են: Մուրսալի, Ուլուջալա, Հաշիմխանլը գյուղերի բնակիչներին փրկելու համար նավակները չեն բավականացնում»,- հայտնել է աղբյուրը:

Թերթը հայտնել է, որ երեկ հայտնաբերվել է մայիսի 7-ին անհայտ կորած Գարագյունեյ գյուղի 18-ամյա բնակիչ Թառլան Իսրաֆիլովի դին:

Թերթը հայտնել է, որ Ադրբեջանի կառավարության` աղետի դեմ պայքարի, բնակչությանն անհրաժեշտ օգնություն ցուցաբերելու գործողությունները անհրաժեշտ արդյունք չեն տալիս`կազմակերպված չլինելու պատճառով:

Էկոլոգիայի եւ բնական հարստությունների նախարարության հիդրոօդերեւութաբանական կենտրոնի տնօրեն Էլնար Սուլթանովը «Ազադլըգ» ռադիոկայանին հայտնել է, որ Մինգեչաուրի ջրամբարի մաքսիմալ մակարդակը 83 մ է, իսկ ներկայում այն արդեն 82,37 մ է: «Հայտնի է, որ անձրեւները կշարունակվեն առաջիկա երեք օրերին, եւ բացի գետերի վարարումից, ջրամբարն անընդահատ լցվելու է նաեւ ձնհալից: Ուրեմն ստիպված կլինեն ջրամբարը փրկելու համար ջուրը բաց թողնել Քուռ: Եվ այս անգամ արդեն հեղեղումները կընդգրկեն նաեւ Եվլախի, Զարդաբի շրջանները»,- գրել է թերթը:

Թերթի այն հարցին, թե ինչու ամռան ամիսներին Մինգեչաուրի ջրամբարի մակարդակը չի իջեցվում նման աղետներից խուսափելու համար, ջրային տնտեսության երկարամյա աշխատակից Ալեսգեր Յուսիֆովն ասել է, որ «Ազերէներժի» ընկերությունը դա հատուկ չի անում, որպեսզի բարձր պահելով ջրի մակարդակը` էներգիա ստանալու համար հատկացված գումարները յուրացնի` դրա փոխարեն էներգիա արտադրելով ջրամբարում հավաքված հավելյալ ջրի հաշվին:
Նրա խոսքերով, Սաբիրաբադում եւ Սալյանում հեղեղումների պատճառն այն է, որ ջրամբար թափվող գետերի վարարումներից ջրամբարի հողե պատնեշի փլուզումից խուսափելու համար սահմանվածից ավելի շատ ջուր է բաց թողնվել Քուռ, որն էլ Արաքսի հետ միանալով` տարածաշրջանում դուրս է եկել ափերից: Ադրբեջանի կառավարությունը անկախացումից հետո տիղմի մաքրման աշխատանքներ չի իրականացրել ոչ Մինգեչաուրի ջրամբարում, ոչ էլ Քռի գետաբերանում: Այս բոլորը միասին դարձել են այսօրվա մեծ աղետի պատճառը»,- ասել է ջրային տնտեսության մասնագետ Ա.Յուսուֆովը: