Ձեր վստահելի աղբյուրը

Խորհրդարանի քննարկման է ներկայացված Հայաստանի «Ընտանեկան օրենսգրքում» փոփոխություններ կատարելու նախագիծը, որը,  Արդարադատության փոխնախարար Գևորգ Մալխասյանի ներկայացմամբ, կրում է զուտ խմբագրական փոփոխությունների տեսք: Սակայն պատգամավորներից ոմանք չհամաձայնեցին այս ձևակերպման հետ, քանի որ, ըստ նրանց, նախագծով բավականին լուրջ հարցեր են փոփոխության առաջարկվում, որպեսզի հնարավոր լինի սա ընկալել զուտ խմբագրման տեսանկյունից: Առավել ևս, որ շոշափվող հարցերից ամենակարևորներն առնչվում են երեխաներին:

Քննարկումներից հետո փոխնախարարը լրագրողներին ներկայացրեց այդ առարկությունների վերաբերյալ կառավարության տեսակետն ու պարզաբանումները:

Ամենից շատ պատգամավորներին` հատկապես Հեղինե Բիշարյանին ու Լարիսա Ալավերդյանին, անհանգստացնում է այն հոդվածը, համաձայն որի օտարերկրյա քաղաքացիներին հնարավորություն է ընձեռվում որդեգրել հայաստանցի երեխաներին:

Գ.Մալխասյանը նշեց, որ իրականում կառավարությունը սկզբունքային որևէ փոփոխություն գործող օրենքում չի իրականացնում.

«Այսօր էլ հատուկ կարգ ունենք այն դեպքերի համար, երբ հայաստանցի երեխային որդեգրում է օտարերկրյա քաղաքացին` նշեմ, որ նրանց համար բավականին բարդ ընթացակարգ է սահմանված»,- ասաց նա և հստակեցրեց, որ կառավարության համաձայնությունը որդեգրման համար պարտադիր է և ոչ միշտ է լինում դրական:

Այդ դեպքում եթե որևէ փոփոխություն չի արվել, ինչո՞ւ են պատգամավորներն աղմկում: Պարզվեց, որ գործող օրենքից դուրս էր մնացել արտերկրում բնակվող ՀՀ քաղաքացիների հայաստանցի երեխա որդեգրելու համար անհրաժեշտ նորմերի հստակեցումը:

Այնպես որ երբ կառավարությունը նշում է, որ փոփոխությունները խմբագրական բնույթ են կրում ` սա նկատի ուներ, քանի որ փոփոխությունները հստակեցնելու արտերկրում բնակվող ՀՀ քաղաքացիների երեխա որդեգրելու իրավունքները:

Մեկ այլ կարևոր հարց, որ շոշափվում է նածագծում , բայց սա արդեն, ըստ Գ.Մալխասյանի, սկբունքային փոփոխությունների շարքին կարելի է դասել: Խոսքը երեխայի ազգանվան փոփոխման հետ կապված գործողություններին է վերաբերում, որովհետև գործող օրենսդրությամբ դրա համար անհրաժեշտ է ծնողների ցանկությունը: Իսկ առաջարկվող փոփոխությունների ընդունման դեպքում արդեն պարտադիր կլինի նաև երեխայի համաձայնությունը` խոսքը 10 տարեկանից բարձր երեխաների մասին է:

Նշենք, որ ոչ միայն «Ժառանգություն» խմբակցության քարտուղար Լարիսա Ալավերդյանի, այլև ԱԺ մարդու իրավունքների պաշտպանության հարցերի մշտական հանձնաժողովի փոխնախագահ Ռաֆիկ Պետրոսյանի կարծիքով «Ընտանեկան օրենսգիրքը» լուրջ փոփոխությունների ու վերանայման կարիք ունի և ճիշտ կլինի այդ խնդիրը դարձնել լայնածավալ քննարկումների առարկա: Այս առաջարկին Գ.Մալխասյանը միայն նշեց, թե չի կարծում, որ այդքան շատ փոփոխությունների կարիք կա, բայց և այնպես կառավարությունը պատրաստ է լսել նրանց և հարկ եղած դեպքում ընդառաջել: