Ձեր վստահելի աղբյուրը

Լեգենդար Deep Purple խմբի հետ այսօր հանդիպման էին եկել ոչ միայն լրագրողները, այլև նրա մոլի երկրպագուները: «You are the best, I love you, You are fantastic…»,-այս և այլ բացականչություններով, ձեռքերի տարբեր շարժումներով, ուժգին ծափահարություններով խմբի մուտքը դիմավորեցին ներկաները: Նշենք, որ համերգի նախօրեին խումբն ասուլիսով հանդես եկավ «Արմենիա Մարրիոթ» հյուրանոցում:

Հանդիպմանը մասնակցելու համար եկել էին նաև խմբի երկրպագուներ հարևան Իրանից` ցուցապաստառներով, Deep Purple գրությամբ վերնաշապիկներով, լուսանկարչական ապարատներով:

Լուսանկարչական ապարատների մասին. ասուլիսի առաջին րոպեներից մինչև վերջին պահը լույսեր էին առկայծում, բացականչություններն էլ չէին դադարում: Խմբի հետ հանդիպման էին եկել անչափահաս երեխաներ, ընդամենը 5-6 տարեկան, ոտքերի թաթերի վրա ձգված փորձում էին քիչ հեռավորությունից տեսնել ռոքի լեգենդներին: Ասուլիսի ավարտից հետո էլ խմբի անդամները չէին կարողանում դուրս գալ սրահից, նրանցից ինքնագրեր էին խնդրում, հետները` լուսանկարվում, հարցեր տալիս:

Նշենք, որ ասուլիսին մասնակցում էին Իէն Գիլանը (վոկալ), Ռոջեր Գլովերը (բաս-կիթառ), Սթիվ Մորսը (կիթառ), Դոն Էյրին (ստեղնային գործքիներ) և Իէն Փեյսը (հարվածային գործիքներ): Նրանք ուրախ էին, անընդհատ ժպտում էին, ասացին երջանիկ են: Նախորդ համերգից ստացած միջոցները նրանք ուղղել են Գյումրու երաժշտական դպրոցը, ասացին, որ հետևում են, տեսել են առաջին նախագծերը, տպավորիչ են:

Տեղեկացնենք նաև, որ այս տարվա սեպտեմբերին կսկսվի Իէն Գիլանի և Հայաստանի պետական սիմֆոնիկ նվագախմբի համատեղ համերգի ձայնագրության DVD-ի ամաշխարհային վաճառքը: Գիլանն ասաց, որ հայկական նվագախմբից հետո հանդես է եկել այլ խմբերի հետ, համեմատություն է անցկացրել, սակայն լավագույնը հայկական ֆիլհարմոնիկն է:

«Ոչ մեկը ձեր խմբից լավը չէր, բոլորը տպավորված են, շուտով առիթ կունենանք այդ ամենը լսելու»,-ասաց նա: Նշենք, որ այդ DVD-ների վաճառքից ստացված եկամտի մի մասը կուղղվի Գյումրիի թիվ 6 երաժշտական դպրոցի վերականգնման հիմնադրամին: Հարավային Կովկասում նրանք բարեգործական ծրագրեր իրականացնում են միայն Հայաստանում: Գիլանն ասաց, որ օրական 3-4 առաջարկ է լինում բարեգործական ինչ-ինչ նախաձեռնությամբ հանդես գալու: «Ես նախընտրում եմ ուժերս ներդնել այն բանի վրա, որը գիտեմ և հնարավոր է իրականացնել»,-ասաց նա:

Հարցերը հիմնականում խմբի անելիքների ու ծրագրերի մասին էին, օրինակ հետաքրքրվեցին, թե երբ կարելի է սպասել խմբի հերթական սկավառակին: «Անսպասելիին սպասելն անիմաստ է»,-հնչեց Գիլանի պատասխանը: Իսկ երբ հարցրին, թե որն է հարվածային գործիքների գաղտնիքը, Իէն Փեյսը ի զարմանս բոլորին, ասաց, որ ինքն այդ գործիքներից այնքան էլ բան չի հասկանում ու դրանց մասին էլ գրքույկ չի պատրաստվում հրատարակել: «Դուք կզարմանաք, թե ես ինչքան բան չգիտեմ հարվածայինների մասին, կան բաներ, որ ես կարող եմ անել, ես երջանիկ եմ դրա համար, մյուսներն էլ վայելում են այն»,-ասաց Փեյսը:

Կատակում են, որ իրենց համերգների ժամանակ կախարդություն է լինում, իսկ դա նրանից է, որ կապ են հաստատում իրենց լսողների հետ: Միայն թե հիմա շատ երկրներում մասսայական ռոք սկելը դժվար է, քանի որ երիտասարդներն ուղղակի տեղ չունեն ռոք նվագելու, երգելու, լսելու համար:

Նախորդող հրապարակումներ`
«Who Cares». Գիլանի և Այոմիի խումբը` Գյումրիի երաժշտական դպրոցի վերականգնման համար

Իէն Գիլանի բարեգործական համերգների հասույթը կազմել է 18 մլն 327 հազ. դրամ

ՀՀ նախագահը՝ Իէն Գիլանին. Հայաստանում դուք մեկ այլ ջերմության ականատես կլինեք
 ՀԱՅՏՆԻ ՌՈՔԵՐՆԵՐԸ ԿՕԳՆԵՆ ԳՅՈՒՄՐԻԻ ԵՐԱԺՇՏԱԿԱՆ ԴՊՐՈՑԻՆ