Ձեր վստահելի աղբյուրը

ԼՂ խնդրի կարգավորմամբ զբաղվող ԵԱՀԿ Մինսկի խմբի համանախագահող երկրների ղեկավարների հայտարարության մեջ Հանրապետական կուսակցության համար հարցականներ կան, կապված հայտարարությունում նշված քայլերի հաջորդականության հետ:

Այսօրվա ասուլիսում արտահայտելով Հանրապետական կուսակցության տեսակետը` այս մասին հայտարարեց Հանրապետական խմբակցության քարտուղար, ՀՀԿ մամուլի խոսնակ Էդուրադ Շարմազանովը: Ներկայացնելով իրենց դիրքորոշումը, Շարմազանովը ևս մեկ անգամ շեշտեց, որ կուսակցության համար խնդրի անկյունաքարը ԼՂ կարգավիճակի հարցն է, մյուս բոլոր հարցերը ածանցյալ են: Նա նախագահների հայտարարությունում կարևորեց ԼՂ ու Հայաստանի միջև ցամաքային կապի, ժողովրդի ազատ կամարտահայտության ու կարգավիճակի վերաբերյալ կետերը:

«Մենք հեռու ենք այն մտքից, որ նախագահների հայտարարության բոլոր կետերը մեզ համար ընդունելի են: Իհարկե, ոչ: Ավելին այնտեղ հարցականներ կան` կապվածշ քայլերի հաջորդականության հետ»,-ասաց հանրապետական պատգամավորը, ապա հիշեցրեց, որ երկրի ղեկավարը բազմիցս հայտարարել է, որ առաջնայինը ԼՂ կարգավիճակի հարցն է, ուստի առաջին հերթին պետք է վերացնել պատճառները, ոչ թե հետևանքները: Դա անհրաժեշտ պայման է երկարատև խաղաղության ու կայունության համար:

«Մենք դեմ չենք փախստականների վերադարձին, բայց փախստականները չեն կարող վերադառնալ մի երկիր, որը կարգավիճակ չունի, որը ճանաչված չէ»,-ՀՀ նախագահի խոսքերը մեջբերեց կուսակից պատգամավորը, ավելացնելով, որ բոլորն ի վերջո պետք է հասկանան, որ ԼՂ-ն ոչ պակաս կայացած ու ժողովրդավար է, քան ասենք Կոսովոն, Աբխազիան, Հարավային Օսեթիան, իսկ Ադրբեջանին ԼՂ-ն կարող է օժանդակել` նրան ժողովրդավարության դասեր տալով:
Նա ևս մեկ անգամ բարձրաձայնեց Հայաստանի դիրքորոշումը, որ ԼՂ-ն չի կարող ունենալ ավելի ցածր կարգավիճակ, քան այսօր է: «Իսկ այսօր Լեռնային Ղարաբաղը անկախ, ժողովրդավարական, ինքնուրույն, շատ նորմալ զարգացող պետություն է»,-ասաց նա:

Ինչ վերաբերում է ԱՄՆ-ի, Ֆրանսիայի ու Ռուսաստանի նախագահների հայտարարության մեջ «օկուպացված տարածքների վերադարձման» արտահայտությանը, ապա Շարմազանովն ասաց, որ «եթե նրանք ի նկատի են ունեցել Ադրբեջանի կողմից օկուպացված Շահումյանը, Մարտակերտի մի մասը, Մարտունաշենն ու Գետաշենը, իհարկե դրանք օկուպացված տարածքներ են, այլ օկուպացված տարածքներ չկան»: