Ձեր վստահելի աղբյուրը

Պոլսո հայոց տեղապահ պատրիարքի ընտրությունները ոչ թե վերացրեցին Պոլսո հայոց համայնքում առկա խնդիրները, երկապառակությունները, այլ ընդհակառակը` դրանք ավելի խորացրեցին, որոնց սրացումը հանգեցնելու է համայնքի լիակատար ուծացմանը: Իսկ դրա պատճառն այն է, որ Պոլոս հայ համայնքը չկարողացավ ընտրել իր նախընտրած թեկնածուին, այլ հոգևոր խորհրդի 25 անդամները նշանակեցին թուրքամետ դիրքորոշում ունեցող Ստամբուլի հայ պատրիարքության հոգևոր խորհրդի նախագահ արքեպիսկոպոս Արամ Աթեշյանին: Այս մասին ասուլիսում ասաց թուրքագետ Ռուբեն Մելքոնյանը` անդրադառնալով հուլիսի 1-ին թուրքաբնակ հայության 84-րդ պատրիարք Մեսրոպ Մութաֆյանի` առողջական լուրջ խնդիրների ու դրանց արդյունքում անգործության պատճառով Թուրքիայում բնակվող հայերի հոգևոր նոր ղեկավարի ընտրություններին:
 
«Ընտրված պատրիարքի տեղապահը, թեև նույն իրավասություններն ունի, ինչ պատրիարքը, սակայն հայ համայքնում չունի այն հեղինակությունը, որ կարողանա լուծել համայնքում առկա խնդիրները: Քանի որ նրան չի ընտրել համայնքը, նա չի վայելում հայության վստահությունը»,- ասաց թուրքագետը:

Իսկ ինչու է ընտրվել հենց նա, այլ ոչ թե Գուգարաց թեմի առաջնորդ Սեպուհ սրբազանը կամ Գերմանիայի թեմի առաջնորդ Գարեգին սրբազանը: Նշենք, որ ընտրություններից առաջ Ստամբուլ մեկնած Սեպուհ սրբազանին հայ համայնքը, որը հայտնի է իր վախվորածությամբ, մեծ ոգևորությամբ է ընդունել նրան:

«Թուրքիայի օրենքի համաձայն, Հայոց պատրիաքի ընտրություն անցկացնելու համար հայ համայնքը նախ պետք է դիմի Ստամբուլի նահանգապետարան, իսկ սա էլ իր հերթին Թուրքիայի արտաքին գործերի նախարարություն: Հայ համայնքը Ստամբուլի նահանգապետին գրություն է ուղարկել` թույլ տալ անցկացնել աթոռակից պատրիարքի ընտրություններ: Հայ համայնքից մեկ այլ խումբ դիմել է նույն խնդրանքով, սակայն նշելով ոչ թե առոթակից, այլ հենց պատրիարք ընտրելու անհրաժեշտության մասին: Այս քայլն արվել է թյուրիմացություն ստեղծելու համար ու հենց թուրքական իշխանությունների հանձնարարականով: Այս ամենի արդյունքում թուրքական իշխանության կողմից բավականին երկար ժամանակ որևէ պատասխան չի տրվել»,- ասաց Ռ. Մելքոնյանը:
 
Բայց հունիսի 29-ին Ստամբուլի նահանգապետարանը հայերի դիմումին պատասխանել է, որ նպատակահարմար չեն համարում թույլ տալ անցկացնել պատրիարքի կամ աթոռակից պատրիարքի ընտրություններ, այլ թույլ են տալիս անցկացնել պատրիաքի տեղապահի ընտրություն, որին պետք է ընտրի հոգևոր խորհուրդը, իսկ խորհուրդն էլ, լինելով կամազուրկ ու կատարելով միայն թուրքական իշխանությունների պահանջները, ընտրում է հենց Արամ արքեպիսկոխպոս Աթեշյանին:
«Այս ամենը մեծ ճգնաժամ է առաջացրել հայ համայնքում: Այն հույսերը, որ նրանք կապում էին այս ընտրությունների հետ, իրենց տեղը զիջել են անորոշությանը, ինչի արդյունքում գերիշխում է հիասթափության մթնոլորտը: Սակայն համայնքը հայտնի լինելով իր համակերպվող բնույթով, լուրջ ընդվզում չի անի և կհամակարպվի»,- ասաց նա` միաժամանակ նշելով, որ եթե ցանկանա էլ, նրան փոխելու որևէ ելք չկա:

Նա նաև ասաց, որ պատրիարքի ընտրությունը թուրքական իշխանությունները պայմանավորում էին նաև հայ-թուրքական զարգացումներով և դա համարում էին իրենց խաղաքարտերից մեկը. «Հայ-թուրքական հարաբերությունների զարգացմամբ կարող է այս խաղաքարտը որոշակի փոփոխությունների ենթրակվի»:
Նշենք, որ Ստամբուլի հայ համայնքը հասնում է 60 հազարի։