Ձեր վստահելի աղբյուրը

Երկրաշարժի հետևանքով Գյումրի քաղաքի անօթևան մնացած ընտանիքների համար պետական միջոցների հաշվին «Գլենդել Հիլզ» կազմակերպության կողմից Մուշ-2 թաղամասում իրականացվող բնակարանաշինարարական աշխատանքներն ավարտվեցին:

Այսօր պաշտոնապես բացվեց Գյումրու Մուշ-2 թաղամասը, որտեղ կառուցվել է 22 բնակելի շենք` 1056 բնակարանով:

Գյումրիում լրագրողների հետ զրույցում ընկերության գլխավոր տնօրեն Վահե Ալմոյանը ասաց. «Այն, ինչ ի սկզբանե ներառված չէր նախագծում` գազի կաթսա, գազօջախ, լվացարան, գազաֆիկացում… նույնպես կատարվել է:
Ընկերությունն իր կողմից, իր հաշվին, հաշվիչների, գազօջախների և կաթսայի միացման ու թողարման գումարներն ամբողջությամբ մարել է` հաշվի առնելով, որ անօթևանների ֆինանսական վիճակը թույլ չի տա նման ծախսեր հոգալ»:

Վ. Ալմոյանը նկատեց նաև, որ թաղամասի կառուցումը կատարվել է շատ կարճ ժամանակահատվածում, ընդ որում շեշտը դրվել էր սոցիալական հիմնախնդրի վրա.

«Մենք կարող էինք որակյալ մասանագետներ բերել` շինարարական աշխատանքների համար, բայց գերադասեցինք, որ հենց գյումրեցիները գան աշխատելու»,- նշեց նա և հավելեց, որ այդ պատճառով նկատել են որոշ թերություններ, որոնք, սակայն, ժամանակի ընթացքում շտկվել են:

1988 թվականի ավերիչ երկրաշարժից 20 տարի անց Շիրակի մարզում անօթևանների թիվը հասնում էր 4245-ի: Այդ իսկ պատճառով էլ, ՀՀ նախագահի անմիջական նախաձեռնությամբ անօթևանների հիմնախնդրի լուծմանն ուղղված աշխատանքների իրականացման համար Շիրակի մարզի Գյումրի քաղաքում 2009-ին մեկնարկեցին շինարարական աշխատանքներ, որոնք իրականացվում են «Գլենդել Հիլզ» ընկերության կողմից:

Այս տարի, նախատեսված էր շահագործման հանձնել 1056 բնակարան` 22 բազմաբնակարան շենք, որոնցից 1 սենյականոց` 440 բնակարան, 2 սենյականոց` 352 բնակարան, և 3 սենյականոց` 264 բնակարան: Բնակարաններն ապահովված են կոմունալ բոլոր անհրաժեշտ պայմաներով, բակերում կառուցվել են խաղահրապարակներ, տարածքը կանաչապատվել է և ապահովվել գիշերային լուսավորությամբ:

Նշենք, որ այս տարի սկսվել է նաև 1949 բնակարանով 37 բնակելի շենքերի կառուցումը, որից 5-ը կառուցվում է Անի թաղամասի վերջնամասում, իսկ 32-ը` Մուշ թաղամասում: Այդ բնակելի շենքերի շինարարության ավարտը հաջորդ տարի:
2011-ին շինարարական աշխատանքներ մեկնարկելու են նաև մարզի այլ համայնքներում:

Հիշեցնենք, որ «Գլենդել Հիլզ» ՓԲԸ-ն հիմնադրվել է 2004 թվականին: Հանդիսանալով Հայաստանում խոշորագույն կառուցապատող ընկերություններից մեկը` «Գլենդել Հիլզ»-ը շուրջ 5 տարվա բարեխիղճ և պրոֆեսիոնալ գործունեության արդյունքում կառավարական և գործարար շրջանակներում, ինչպես նաև սպառողների շրջանում վայելում է անշարժ գույքի և կառուցապատման ոլորտի վստահելի գործընկերոջ համբավ: Ընկերության գլխավոր նպատակն է ապահովել հաճախորդների գումարների անվտանգությունը՝ որպես անշարժ գույքի կապիտալի ներդրում:
«Գլենդել Հիլզ»-ն ակտիվ մասնակցություն է ցուցաբերում հանրապետության քաղաքաշինական և բարեկարգման ծրագրերին, ինչպես նաև իրականացնում է պետական և սոցիալական նշանակության մի քանի խոշոր ծրագրեր: «Գլենդել Հիլզ»-ը խմբի անդամ մյուս ընկերությունների հետ միասին միայն Երևանում իրականացնում է 22 նախագիծ` մոտ 600 000 քմ, իսկ մայրաքաղաքի սահմաններից դուրս` 4 նախագիծ` մոտ 450 000 քմ կառուցապատման ընդհանուր մակերեսով:
Մատչելի գներով և վճարման ճկուն եղանակներով առաջարկելով բնակարաններ ու առևտրային տարածքներ նորակառույց շենքերում` մենք ձեռք ենք բերել գնորդների լայն զանգված ինչպես ՀՀ-ում, այնպես էլ` արտերկրում:
Ըստ այդմ` ընդառաջելով արտասահմանցի գնորդների պահանջարկին` 2008թ. ապրիլին ՌԴ-ի մայրաքաղաք Մոսկվայում մեր ընկերության կողմից հիմնադրվեց «Գլենդել Հիլզ Ռու» ՍՊԸ-ն, որն ունի «Գլենդել Հիլզ» ՓԲԸ-ի և խմբի անդամ մյուս ընկերությունների կողմից կառուցվող բնակարանները և առևտրային տարածքները վաճառելու բացառիկ իրավունք:
«Գլենդել Հիլզ»-ը սոցիալապես պատասխանատու, թափանցիկ գործող կազմակերպություն է և միշտ հավատարիմ է իր և խմբի անդամ մյուս ընկերությունների կարգախոսին`լինել վստահելի գործընկեր, գնորդին առաջարկել որակյալ և մատչելի կառույցներ: