Ձեր վստահելի աղբյուրը

Նախօրեին Երևանում մեկնարկել է «Ոսկե ծիրան» 7-րդ միջազգային կինոփառատոնը։ Փառատոնը մեկնարկել է Անրի Վեռնոյի «Մայրիկ» ֆիլմով:

Նշենք, որ նախքան փառատոնի մեկնարկը` տեղի է ունեցել ավանդական ծիրանօրհնեքը (Սուրբ Զորավոր եկեղեցի), Մոսկվա կինոթատրոնի առջև վարչապետ Տիգրան Սարգսյանի, մշակույթի նախարար Հասմիկ Պողոսյանի, քաղաքապետ Գագիկ Բեգլարյանի և իտալացի կինոաստեղ Կլաուդիա Կարդինալեի մասնակցությամբ բացվել են Համո Բեկնազարյան, Ռուբեն Մամուլյան, Սերգեյ Փարաջանով ու Անրի Վերնոյի աստղերը` աստեղերի ճեմուղին:

Բացման արարողությանը մշակույթի նախարար Հասմիկ Պողոսյանը աշխարհահռչակ դերասանուհի Կլաուդիա Կարդինալեին հանձնել է մշակույթի նախարարության ոսկե մեդալը։

Փառատոնը ստացել է մոտ 500 հայտ աշխարհի 75 երկրներից` այդ թվում առաջին անգամ Հորդանանից, Նիկարագուայից, Վենեսուելայից, Կոստա Ռիկայից և այլն։ Ընտրվել է 120 ֆիլմ: Կինոփառատոնը ներկայացնում է 3 մրցութային ծրագիր` միջազգային խաղարկային, վավերագրական ֆիլմերի, Հայկական համայնապատկեր: 3 մրցութային ծրագրերը դատում են միջազգային 5 ժյուրիներ` միջազգային խաղարկային, միջազգային վավերագրական, Հայկական համայնապատկեր, ինչպես նաև` ՖԻՊՐԵՍՍԻ-ի կամ Կինոքննադատների միջազգային ֆեդերացիայի և Էկումենիկ կամ եկեղեցիների անկախ ժյուրի:

Այս տարի փառատոնի ընթացքում հարգանքի տուրք է մատուցվելու հայ կինոյի մի քանի նվիրյալների` տոնելով կինոռեժիսոր Հենրիկ Մալյանի 85, դերասաններ Մհեր Մկրտչյանի և Խորեն Աբրահամյանի 80-ամյա հոբլեյանները, օպերատոր Ալբերտ Յավուրյանի 75-ամյակը, ինչպես նաև` կյանքի 75-րդ տարում դեռ ակտիվ նկարահանվող դերասան Արմեն Ջիգարխանյանի հոբելյանը։ Հայկական կինոյի արժեվորմանն են ուղղված նաև 2 սփյուռքահայ ռեժիսորների հոբելյաններին նվիրված հատուկ ծրագրերը` Անրի Վեռնոյ – 90 և Ատոմ Էգոյան – 50։

Այս տարի առաջին անգամ փառատոնի 7 օրերի ընթացքում տեղի է ունենալու նաև ջազ համերգ` հայկական ջազային խմբերի մասնակցությամբ:

«Ոսկե ծիրան» 7-րդ կինոփառատոնը շարունակվելու է մինչև հուլիսի 18-ը: Նշենք, որ փառատոնի հովանավորն է «ՎիվաՍել-ՄՏՍ» ընկերությունը: