Ձեր վստահելի աղբյուրը

Ադրբեջանը հրաժարվել է տրամադրել իր օդային տարածքի օգտագործման թույլատվությունը`  Աֆղանստանից Երևան ուղևորվող գերմանական ինքնաթիռին։ Այս մասին  տեղեկանում ենք «Ազատություն» ռադիոկայանից:

 Ռսդիոկայանին ՀՀ ՊՆ-ի իր աղբյուրներից հայտնի է դարձել, որ ՆԱՏՕ-ի՝ Աֆղանստանի անվտանգության ապահովման միջազգային ուժերի գործողությունների համար փոխադրումներ կատարող մարդատար ինքնաթիռը Երևան էր տեղափոխում Կունդուզի նահանգում գերմանական հրամանատարության ներքո իրենց ծառայությունը ավարտած հայ խաղաղապահների հերթափոխին;  Այն հարկադրված է եղել այլ երթուղի ընտրել։ Նշենք, որ  հայ խաղաղապահները դեռևս չեն ժամանել Երևան։

Ըստ, աղբյուրի, Հայաստանի պաշտպանության նախարարությունում այս միջադեպը գնահատվել է որպես Աֆղանստանում ՆԱՏՕ-ի ուժերի մատակարարման գործընթացը խոչընդոտելու, ինչպես նաև դեպի Աֆղանստան փոխադրումների համար Հայաստանի օդային տարածքի եւ օդանավակայանների օգտագործման հնարավորությունները սահմանափակելու փորձ։

Ըստ այդմ, պաշտպանության նախարարությունում քննարկվում է համարժեք քայլեր ձեռնարկելու՝ մասնավորապես` Բաքվում վայրէջք կատարող ռազմական նշանակության բեռներ տեղափոխող ինքնաթիռներին Հայաստանի օդային տարածքի օգտագործման թույլատվությունը չտալու համար:

Նախկինում Հայաստանը մշտապես բաց է պահել իր օդային տարածքը` Թուրքիայից դեպի Ադրբեջան, իսկ այնուհետև Աֆղանստան մեկնող և վերադարձող ինքնաթիռների համար։