Ձեր վստահելի աղբյուրը

«Գեղամա» ռեստորանում գրանցված մասսայական թունավորման համաճարակաբանական հետազոտության արդյունքները ցույց են տվել, որ վարակի փոխանցման հավանական գործոնը սնունդն է, քանի որ հիվանդներն օգտվել են հանրային սննդի կազմակերպությունում պատրաստված կերակրատեսակներից:

Ինչպես Panorama.am-ին տեղեկացնում են առողջապահության նախարարության լրատվական ծառայությունից, վարակի գաղտնի շրջանի տևողության ժամանակաշրջանն ու կլինիկական ախտանիշները, ինչպես նաև դրանց միաժամանակ ի հայտ գալը բնորոշ են սննդային թունավորմներին:

Պարզվել է նաև, որ բոլոր հիվանդների մոտ արձանագրվել է փսխում, սրտխառնոց, թուլություն, որովայնի շրջանում ցավեր, լուծ: Որոշ հիվանդների մոտ` նաև դող, սարսուռ և ջերմություն (38 աստիճան):

Տեղեկացանք նաև, որ հիվանդության հետագա տարածումը կանխելու նպատակով` ՀՀ առողջապահության նախարարության կողմից ձեռնարկվել են կանխարգելիչ և հակահամաճարակային միջոցառումներ. Հիվանդները հոսպիտալացվել են և նրանց նկատմամբ կազմակերպվել են մանրէաբանական հետազոտություններ, սահմանվում է բժշկական հսկողություն խնջույքի մյուս մասնակիցների նկատմամբ, «Գեղամա» ռեստորանում կազմակերպվել և իրականացվել են ախտահանման աշխատանքներ: Ժամանակավորապես դադարեցվել է ռեստորանի գործունեությունը:

Ըստ աղբյուրի` ուսումնասիրության ժամանակ օգտագործված սննդամթերքից, ջրից, շրջակա միջավայրից, ինչպես նաև` ողջ անձնակազմից վերցվել են նմուշներ թունավորման պատճառագիտությունը պարզելու և լաբորատոր փորձաքննություն իրականացնելու համար:

Այսօրվա դրությամբ 38 հիվանդ առողջացմամբ դուրս է գրվել, հոսպիտալացված 3 հիվանդի առողջական վիճակը բարավարար է, ունեն առողջացման դրական միտում: ԱՆ-ից տեղեկացանք նաև, որ հակահամաճարակային միջոցառումները շարունակվում են, իրավիճակը վերահսկվում է:

Հիշեցնենք, որ «Գեղամա» ռեստորանից սննդային թունավորման նախանշաններով հիվանդանոց էր տեղափոխվել 41 քաղաքացի:

Նախորդող նորություն` Թունավորում ռեստորանում. 41 քաղաքացի տեղափոխվել է հիվանդանոց