Ձեր վստահելի աղբյուրը

Արդեն ոչ մեկի համար գաղտնիք չէ, որ Ադրբեջանի սուլթան Իլհամ Ալիևի ռազմաշունչ հայտարարություններն ու առանձին կիսաքայլերը հիմնականում ուղղված են կամ ներքին սպառմանը, կամ էլ որոշակի մեսիջ են այս կամ այն գերտերությանը, վերջին շրջանում` հատկապես Ռուսաստանին: Սա ակնհայտ է նաև այլ պետությունների քաղաքագետների ու փորձագետների համար, որոնք մեկ անգամ չէ, որ հայտարարել են, թե Ալիևի պահվածքն ընդամենը բլեֆ է և նրան մի կողմից ձեռնտու չէ ԼՂ հակամարտության կարգավորումը, ապա` առավել ևս ձեռնտու չէ պատերազմի վերսկսումը: Ընդ որում, վերջինս ձեռնտու չէ ոչ միայն այն տեսակետից, որ նա երաշխիքներ է տվել շատ մեծ նավթային ընկերություններին, որ պատերազմ չի լինելու, այլև այն պարզ պատճառով, որ սուլթանը համոզված է, թե պատերազմի դեպքում Ադրբեջանի վերջնական կործանումն անխուսափելի է: Սակայն հայտարարություններից զատ նրան անհրաժեշտ են նաև որոշակի քայլեր, որոնք նա փորձում է ի կատար ածել: Այլ հարց է, որ դրանք բոլորն էլ ձախողվում են և ձախողվելու են: Դա Ալիևին ամենևին չի հետաքրքրում: Նրա համար կարևորը աղմուկն է և ցուցքը` թե ինքը միայն խոսքեր չի շռայլում, առավել ևս, որ դրանցով որոշակի մեսիջներ է ուղարկում, օրինակ, Դմիտրի Մեդվեդևին: Հերթական կիսաքայլն Ալիևը նախաձեռնեց սեպտեմբերի 3-ի լույս 4-ի գիշերը:
Ինչպես արդեն տեղեկացվել է, ժամը 06:50-ի սահմանում ղարաբաղա-ադրբեջանական զորքերի շփման գոտու հյուսիսարևելյան ուղղությամբ (Ջրաբերդ բնակավայրից մոտ 2կմ արևելք) արձանագրվել է հակառակորդի հետախուզական-դիվերսիոն խմբի հերթական առաջխաղացման փորձ: ՊԲ առաջապահ ստորաբաժանումների կողմից ձեռնարկված համապատասխան գործողությունների և ծավալված մերձամարտի արդյունքում ադրբեջանական գրոհայինները` ՊԲ մարտական հենակետում թողնելով 1 դիակ, հետ են շպրտվել: Ավելին, ճողոպրելու ճանապարհին դիվերսիոն խմբի անդամները պայթել են ականների վրա, կան վիրավորներ:

Իհարկե, հրադադարի խախտումներ ադրբեջանցիները թույլ են տալիս ամեն օր, սակայն նման դիվերսիոն գործողությունները, ինչպես ցույց է տալիս ալիևշչինայի քայլերի տրամաբանությունը (եթե, իհարկե, տրամաբանություն ընդհանրապես կա), պատահական չեն լինում, այլ շատ որոշակի օրերի և շատ որոշակի նպատակով` հիմնականում նույնիսկ վստահ, որ այդ փորձերը որևէ հաջողություն չեն ունենալու, իսկ զինվորներն ուղղակի զոհաբերվելու են միմիայն Ալիևի քաղաքական խաղերի համար: Ինչու հենց այս գիշեր: Նախ, ուշագրավ է, որ հենց այսօր Ադրբեջանում պաշտոնապես մեկնարկեց խորհրդարանական ընտրությունների նախընտրական արշավը:

Շատ փորձագետների կարծիքով, գիշերային դիվերսիոն փորձը ալիևշչինայի քարոզչական արշավի յուրօրինակ սկիզբ է: Սակայն միայն ներքին քարոզչական հարցերով թեման չի սահմանափակվում: Սուլթանն ըստ էության փորձում է «մեկ հարվածով երկու նապաստակ խփել». ի մասնավորի, գիշերային ադրբեջանական ավազակության հերթական դրսևորումը յուրահատուկ մեսիջ էր Ռուսաստանի նախագահ Դմիտրի Մեդվեդևին, հակառակ դեպքում հազիվ թե Ալիևը նման քայլի գնար` Մեդվեդևի` Ադրբեջանում գտնվելու օրը:

Հասկանալի է, որ Ալիևին նյարդայնացնում էր ռուսական ռազմաբազաների` Հայաստանում ներկայության ժամկետի երկարաձգման փաստը, ինչով Ռուսաստանը լրացուցիչ երաշխիքներ էր տալիս Հայաստանին` անվտանգության տեսակետից: Ուղղակիորեն` բնականաբար, ոչ ԼՂՀ-ին, սակայն բոլորն էլ հասկանում են, որ Արցախ ասելով միշտ պետք է նկատի ունենալ նաև Հայաստանը, և հակառակը: Ավելին, Բաքվում Մեդվեդևն ըստ էության այնպիսի բաներ չասաց, որոնք լիովին կհանգստացնեին Ալիևին, ընդհակառակը` ՌԴ նախագահը մեկ անգամ ևս հավաստեց, որ Ռուսաստանի համար առաջնայինը խնդրի խաղաղ կարգավորումն է: Առավել ևս, որ շատ փորձագետների կարծիքով, Մեդվեդևի Բաքու կատարած այցը, ի տարբերություն հայաստանյան բավական հագեցած և արդյունավետ այցի, առանձնապես շոշափելի արդյունքներ չունեցավ և նախատեսված էլ չէր, քանի որ ընդամենը հավասարակշռություն պահպանելու նպատակ էր հետապնդում: Ընդ որում հակամեդվեդևյան այս դեմարշը նորություն չէ:

Հիշենք, որ դեռևս հունիսին Հայաստանի, Ռուսաստանի և Ադրբեջանի նախագահների եռակողմ հանդիպումից հետո, երբ ակնհայտ դարձավ, որ առավել շահեկան վիճակում է Հայաստանն իր ամուր դիրքերով ու փաստարկներով, ինչպես նաև չարդարացան ալիևշչինայի հույսերը, թե Մեդվեդևն ուր որ է ճնշելու է Հայաստանին, Ադրբեջանի սուլթանատի ղեկավարը անմիջապես վերադարձավ Բաքու` այդպես էլ չմասնակցելով միջազգային ֆորումին: Ընդ որում, պաշտոնական տեղեկատվության համաձայն, Իլհամ Ալիևը Սանկտ Պետերբուրգ էր մեկնել առաջին հերթին հենց Միջազգային տնտեսական ֆորումին մասնակցելու նպատակով: Սակայն ամեն ինչ սրանով չվերջացավ: Ալիևը Ադրբեջան վերադառնալու նույն գիշերը կյանքի կոչեց Չայլուի ստոր դիվերսիան: Եվս մեկ համանման դիվերսիա իրականացրեց Մեդվեդևի` Ադրբեջան կատարելիք այցի նախօրեին:

Հերթականը` հենց ՌԴ նախագահի այցի օրը: Սա բավական խոսուն փոստ է, ու ամենայն հավանականությամբ ՌԴ իշխանությունները շուտով հստակ եզրահանգումներ կկատարեն: