Ձեր վստահելի աղբյուրը

Այս մի քանի օրերի ընթացքում շատ բան կարող է տեղի ունենալ Աղթամարի Սուրբ խաչի շուրջ, քանի որ հանրաքվեն վերջացավ և շատ բան հնարավոր է փոխվի: Այդպիսի տեսակետ հայտնեց ստամբուլյան «Ագոս» թերթի խմբագրապետ Ռոբերտ Քոբթաշը Հայաստանից ժամանած լրագրողների հետ հանդիպման ժամանակ, տեղեկացնում է Panorama.am-ի թղթակիցը Ստամբուլից:

Մեր դիտարկմանը, թե Պոլսո Հայոց պատրիարքական ընդհանուր փոխանորդ Արամ Աթեշյանն արդեն իսկ հայտարարել է, թե պատարագի օրը խաչը կտեղադրվի եկեղեցու դիմաց և կցուցադրվի հյուրերին Քոբթաշը նկատեց. «Պատրիարքարանն այդ տեսակ հարցերու շուրջ շատ խիզախ կեցվածք չի կարող ունենալ և հասկանալի է: Կառավարությունից տարբերվող կեցվածք կարող էին ունենալ, բայց Աթեշյան սրբազանն այդ անձը չէ»:

«Ագոս»-ի գլխավոր խմբագրի խոսքով, թուրքական կառավարությունն անընդունելի բաներ շատ է անում, սակայն եկեղեցին վերանորոգելը կարևոր էր` հայկական պատմական հարստությունը նորոգվում է թուրքական պետության կողմից:

«Եկեղեցին իր փլված վիճակից կազատվի հիմա, և մենք, իբրև հայեր, ուզում ենք ցույց տալ, որ այդ եկեղեցին մերն է ոչ թե պետությանը և այսօր պայքար կա», հավելեց Քոբթաշը` ընդգելով, որ հենց այդ պատճառով էլ իրենք ծրագրել են պատարագի ացկացման օրը, սեպտեմբերի 19-ին լինել Սուրբ Խաչ կեղեցում: «Ուզում ենք այդ օրը լինել Աղթամար կղզում` իբրև հավատացյալ, իբրև հայ, իբրև մեր մշակույթի և պատմության տեր», -նկատեց նա:

Հարցին, թե ինչպե՞ս է պոլսահայությունն ընդունել Հայաստանի հոգևորականների որոշումը չգալ և չմասնակցել Սուրբ Խաչում մատուցվելիք պատարագին, Քոբթաշն ասաց, որ իրենք էլ չեն ընդունոմ թուրքական կառավարության քայլերը:
«Մեր իրողությունը բացիբաց գրել ենք, եթե բողոքել է պետք, բողոքել ենք, բայց երբեք չպետք է փակել երկխոսության դուռերը: Եթե մենք իբրև Թուրքիո հպատակներ փակենք երկխոսության դռները, ասելիք չենք կարող ունենալ», -նշեց նա: