Ձեր վստահելի աղբյուրը

Ղարաբաղյան հակամարտությանն առնչվող խնդիրների քննարկում եվրոպական դատական ատյաններում առաջին անգամ է կայանում: Այսինքն, ոչ միայն հերթական հնարավորությունն է ստեղծվում իրեն հարազատ ատյաններից միջազգային հանրությանն ապացուցելու Ադրբեջանի քաղաքականության ու դիվանագիտության շինծու լինելը  հայկական կողմի ներկայացրած հիմնավոր փաստարկների շնորհիվ, այլև Հայաստանը կրկին կարողանում է աշխարհին ներկայացնել ղարաբաղյան հակամարտության բուն էությունն ու այն ձևախեղված ներկայացնելու Ադրբեջանի զուր փորձերը: Հիշեցնենք, որ այս ամենը Մարդու իրավունքների եվրոպական դատարան ներկայացրած միանգամից երկու հայցի դատական քննության շրջանակներում է կատարվում:

Հայցերից մեկը, ինչպես հայտնի է, ներկայացրել է ԼՂ Շահումյանի շրջանի Գյուլիստան գյուղի նախկին բնակիչ Մինաս Սարգսյանի ընտանիքը, մյուսը՝ ադրբեջանցի Չիրագովների ընտանիքը, որը նախկինում բնակվել է Լաչինի շրջանում: Ստրասբուրգում կայացած դատական լսումների մանրամասներն արդեն հայտնի են, ավելի կարևոր են այն շեշտադրումներն ու գրագետ հիմնավորված իրավական փաստարկները, որոնք ներկայացրել է հայկական կողմը՝ երկու դատական հայցերի լսումների ընթացքում: Դրանք, ի հակադրումն ադրբեջանական կողմի ներկայացրած փաստարկների, եվրոպական դատարանի փորձագետներն ընկալել են որպես լուրջ հիմնավորումներ :

Հայաստանում արդեն դատական լսումների ավարտին էլ պարզ էր, որ մեր առաքելությունը Մարդու իրավունքների եվրոպական դատարանում, ըստ ամենայնի, դրական արդյունքներ կտա, և դատավճիռը կլինի հօգուտ հայկական կողմի: Համենայն դեպս, այդպիսի ակնկալիքներ կան, և դրանք, ինչպես արդեն նշվեց, հայկական կողմի արդարացի ու հիմնավորված իրավական փաստարկների առկայությամբ են պայմանավորված: Որքան էլ եվրոպական դատական ատյանը, ելնելով հարցի քաղաքական կոնյուկտուրայից, դատավճիռ կայացնելիս փորձի նույն ստանդարտները կիրառել հայկական և ադրբեջանական կողմերի համար, չի կարող հերքել ներկայացված փաստարկների հակակշիռը, քանի որ դատական լսումների ընթացքում արդեն իսկ պարզ էր, որ Ադրբեջանի ներկայացրած հիմնավորումները այստեղ քիչ են «հիմնավորման» դեր կատարում: