Ձեր վստահելի աղբյուրը

Այսօր մեկնարկեց «Մասնագիտական կրթություն որակի ապահովման առկա խնդիրները և զարգացման հեռանակարները ՀՀ-ում» խորագրով երկօրյա համաժողովը: Նշենք, որ համաժողովը կազմակերպել է «Մասնագիտական կրթություն և որակի ապահովման ազգային կենտրոնը»`Համաշխարհային բանկի և մի շարք ուսամնական հաստատությունների ֆինանսական աջակցությամբ:

Համաժողովին մասնակցում է շուրջ 250 մասնակից`բուհերի, նախնական և միջին մասնագիտական ուսումնական հաստատությունների ղեկավարներ, դասախոսներ և ուսանողներ, ինչպես նաև գործարարներ, կրթության, գիտության ու տնտեսության ոլորտի գերատեսչական պատասխանատուներ:

Համաժողովի բացմանը ՀՀ Կրթության և գիտության նախարար Արմեն Աշոտյանը նշեց, որ կրթության որակը կրթական համակարգի ամենարդիական խնդիրներից մեկն է, ուստի որակի ապահովման ժամանակակից մեխանիզմները պետք է ներդրվեն թե բուհական, թե միջին մասնագիտակն կրթության ոլորտում:

«Այս համաժողովից մենք ակնկալում ենք արդյունավետ քննարկումներ, միջազգային լավագույն փորձի ուսումնասիրում, կարծիքների փոխանակում, և ամենակարևորը, շահագրգիռ կազմակերպությունների ներգրավվում որակի ապահովման մեխանիզմների մշակմանը»,- ասաց նախարարը և հավելեց, որ այժմ մշակվում է բուհերի հավատարմագրման նոր ընթացակարգ, ըստ որի պետք է մոտակա տարիներին վերահավատարմագրման գործընթաց իրականացվի`հաշվի առնելով մասնագիտական կրթության որակի ապահովման ազգային համակարգի նոր մոտեցումները:

Ըստ նախարարի, առանց ժամանակակից որակի հսկողության մեխանիզմների որևէ երկրի բուհական համակարգ չի կարող հավակնել միջազգային լինելուն:

«Մենք վերջին 1,5 տարվա ընթացքում «Մասնագիտական կրթություն և որակի ապահովման ազգային կենտրոն» հիմնադրամի հետ կատարել ենք ծավալուն աշխատանք` հասկանալու համար թե Հայաստանում ինչպիսի հավատարմագրման և որակի հսկողութայն մեխանիզմներ կարող են աշխատել»,- ասաց նախարարը և հավելեց, որ այժմ թևակոխում են տեսական մշակումների եզրափակիչ փուլ, որից հետո քայլեր կձեռնարկվեն նորմատիվ դաշտի մշակման ուղղությամբ:

«Մասնագիտական կրթություն և որակի ապահովման ազգային կենտրոն» հիմնադրամի տնօրեն Ռուբեն Թոփչյանը նշեց, որ համաժողովում կքննարկվեն մեր երկրում մասնագիտական կրթության որակի ապահովման ազգային համակարգի նոր մոտեցումներ, ոլորտը կանոնակարգող մի շարք փաստաթղթերի նախագծեր, ինչպես նաև կենտրոնի կողմից արդեն մշակված որակի ապահովման չափանիշները և չափորոշիչները:

Նրա խոսքով, դա կնպաստի, որպեսզի ուսումնական հաստատություններում ստեղծվի որակի կառավարելի միջավայր:

«Որակի կառավարման համար ուսումնական հաստատությունը պետք է անընդհատ զբաղվի իր բոլոր գործընթացների պլանավորմամբ, որի շնորհիվ էլ որակը կդառնա կառավարելի»,- ասաց նա:

Ռ. Թոփչյանի խոսքով, մասնագիտական կրթության որակի ապահովման չափորոշիչները և չափանիշները հիմք կհանդիսանան ուսումնական հաստատությունների հավատագրման համար: Նա նաև հավելեց, որ կրթության որակի ապահովման ազգային համակարգի նոր մոտեցումները մշակվել են որակի ապահովման եվրոպական չափանիշների ու չափորոշիչների հիման վրա և ուղղավծ են նաև միջազգային ասպարեզում մեր երկրի կրթության որակի համաընթեռնելիության ու ճանաչելիության ապահովմանը: