Ձեր վստահելի աղբյուրը

Հոկտեմբերի 5-ին Հայաստանում առաջին անգամ պաշտոնապես կնշվի ուսուցչի տոնը, որի կազմակերպման համար ֆինանսական միջոցներ կհատկացնի ՀՀ կառավարությունը: Այս մասին որոշումը ընդունվեց կառավարության այսօրվա նիստում:
Ինչպես նշեց ՀՀ կրթության և գիտության նախարար Արմեն Աշոտյանը, միջոցառման կազկակերպման աշխատանքները վստահվել են մասնավոր ընկերությանը, քանի որ նախարարությունը տվյալ մշակութային ստեղծագործական ներուժը չունի, որպեսզի ինքնուրույն կազմակերպի համապատասխան միջոցառումը` սկսած բեմի ձևավորումից, լուսային ռեժիսուրայից մինչև սցենար: Իսկ այն կազմակերպությանը, որին վստահում են, ունի պետական միջոցառումներ կազմակերպելու փորձ:

ՀՀ վերահսկիչ պալատի նախագահ Իշխան Զաքարյանի կարծիքով էլ  կարելի էր այդ միջոցառման կազմակերպումը վստահել ՀՀ մշակույթի նախարարությանը.

«Հասարակական կազմակերպությունների դեմ ոչինչ չունեմ, բայց պետական միջոցներով, որոնք հատկացվում են 1 կամ 7 օր տևողությամբ միջոցառումների կազմակերպան համար, կարելի է 9 ամիս աշխատավարձ վճարել: Իսկ եթե նախարարության որևէ բաժին կազմակերպի, ապա հնարավոր էր հսկողությունն ավելի լավ իրականացնել»:

ՀՀ վարչապետ Տիգրան Սարգսյանը հակադարձելով նրան, նշեց, որ մշակույթի նախարարությունը նման միջոցառումներ չի կազմակերպում: «Այդ նախարարությունը բնագավառում քաղաքականության իրականացման մարմին է, բայց միջոցառումներ իրականացվում են մասնավոր մասնագիտացված կազմակերպությունների միջոցով: Մեր նախարարություններն այլևս միջոցառում կազմակերպելու գործառույթներ չունեն: Կամ նրանք լինում են ՊՈԱԿ-ներ, կամ մասնավոր»,- ընդգծեց վարչապետը: Նա վստահեցրեց, որ ՎՊ-ն կարող է հետևել ֆինանսական միջոցներն արդյունավետ օգտագործմանը:

Կառավարության նիստում ՀՀ Սփյուռքի նախարար Հրանուշ Հակոբյանն էլ առաջարկեց ուսուցչի տոնը դարձնել համահայկական, որպեսզի սփյուռքահայ ուսուցիչները նույնպես մասնակցեն այս միջոցառումներին:Ա.Աշոտյանը նշեց որ համահայկական տոն դարձնելու հետ կապված առարկություններ չունեն, բայց ՀՀ օրենքը տարածվում է միայն Հայաստանի տարածքում:

Վարչապետ Տ.Սարգսյանի խոսքերով, Սփյուռքի նախարարի հարցադրումը պետք է ընդունել որպես ընդհանրական հարցադրում: «Եթե այդպես լինի, պետք է բոլոր տոներին անդրադառնանաք և հասկանանք, թե ինչ ձևաչափ է առաջարկում Սփյուռքի նախարարությունը մեր պետական տոների, մասնագիտական տոների նշման առումով: Մենք ունենք ֆինանսական աշխատողի օր, ոստիկանության, դատախազության տոն, այսինքն դա է՞լ պետք է համահայկական դարձնել »,- նկատեց Տ.Սարգսյանը:

Այդուհանդերձ, Հ.Հակոբյանը մնաց այն կարծիքին, որ այս տոնը պետք է համահայկական դարձնել: « Սփյուռքի ուսուցիչներն էլ մերն են: Մենք սեպտեմբերի 21-ը, մայիսի 28-ի, ապրիլի 24-ը, նույնիսկ Էրեբունի-Երևան տոնակատարությունը նշում են համահայկական կերպով, ապա այս տոնն էլ պետք է ընդգրկել»,- ասաց Հրանուշ Հակոբյանը: Վարչապետն էլ նախարարին առաջարկեց ներկայացնել իրենց առաջարկությունները, որպեսզի քննարկեն , թե կոնկրետ ուսուցչի տոնը այսուհետև ինչպես են տոնելու:
Նշենք նաև, որ կառավարությունը իր պահուստային ֆոնդից գումար կհատկացնի`մոտ 10000 ԱՄՆ դոլար, որով լավագուjն ուսուցիչ և դաստիարակ անվանակարգերում հաղթողների համար ավտոմեքենա ձեռք կբերվեն : Նախատեսվում է ավանդական ժիգուլու փոխարեն նրանց նվիրել արտասահմանյան մակնիշի, բայց ցածր բյուջեով ավտոմեքենա: Սակայն, ըստ վարչապետի, լավագույն ուսուցիչների համար չի կարելի տնտեսել: