Այսօր Խանտի Մանսիյսկում կընտրեն ՖԻԴԵ-ի նախագահին

Սպորտ 10:43 29/09/2010

Այսօր Խանտի Մանսիյսկում կընտրեն ՖԻԴԵ-ի նախագահին

Համաշխարհային շախմատային 39-րդ Օլիմպիադայի մայրաքաղաք Խանտի Մանսիյսկում այսօր տեղի կունենան ՖԻԴԵ-ի նախագահի ընտրությունները: Արդեն երեկ սկսվել է նախապատրաստությունը այդ կարևոր իրադարձությանը: Դահլիճում, որտեղ ընթանում է համաժողովը, տեղադրվել են քվեատուփեր: Իսկ քարտուղարությունը երեկվա ընթացքում ընդունում էր այն երկրների լիազորագրերը, որոնց ներկայացուցիչներն այս կամ այն պատճառով չեն ժամանել Խանտի Մանսիյսկ:

Հիշեցնենք, որ ՖԻԴԵ-ի նախագահի պաշտոնին հավակնում են Միջազգային շախմատային ֆեդերացիայի ներկայիս ղեկավար Կիրսան Իլյումժինովը և աշխարհի չեմպիոն Անատոլի Կարպովը: Հաղթանակի համար անհրաժեշտ կլինի ստանալ 82 երկրի աջակցություն:
Համաժողովի շենքում հայտնվել են քարոզչական թերթիկներ` իրենց բովանդակությամբ վկայելով, որ ՖԻԴԵ-ի նախագահի ընտրությունը քաղաքական երանգ է ձեռք բերում: Համաժողովի մասնակիցները կարծում են, որ ընտրություններն անկանխատեսելի ընթացք կունենան:
«Թեկնածուները գայթակղիչ նախագծեր են ներկայացրել: Կիրսան Իլյումժինովը հաղթանակի դեպքում շախմատային դպրոցներ կհիմնի բոլոր մայրցամաքներում: Անատոլի Կարպովը պատրաստվում է հանել կոնգրեսականների և շախմատիստների անդամավճարները: Օրինակ` աշխարհի գավաթի խաղարկությունում հավաքականը մասնակցության համար վճարում է 10 հազար եվրո անդամավճար»,- նշել է Եթովպիայի ներկայացուցիչ Յոզեֆ Դեյմոն:

«Մենք քվեարկելու ենք հանուն շախմատային ֆեդերացիայի ապագայի, իսկ թե ինչպիսին կլինի այն, յուրաքանչյուր երկիր իրավունք ունի որոշել ինքնուրույն: Պայքարը միանշանակ լարված կլինի: Թեկնածուներն ինտելիգենտ մարդիկ են»,- ասել է Բուլղարիայի ներկայացուցիչ Ստեֆան Սերգիևը:

Քվեարկությունը կսկսվի այսօր և կտևի մի քանի ժամ: Ձայների հաշվարկը կկատարվի կեսօրին:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: