Ձեր վստահելի աղբյուրը

«Նոր ուսումնական տարում ավագ դպրոցների գործընթացը բավականին սահուն կազմակերպվեց, երեխաները ավարտեցին հիմնական դպրոցը, և յուրաքանչյուրն ավելի ճիշտ իր տեղը գտավ` կամ ավագ դպրոցներում, կամ միջին մասնագիտական կրթական հաստատություններում: Կարծես թե նպատակը և առաքելությունը ավագ դպրոցի սկսվում է իրականացվել»,- այս մասին այսօր կայացած ասուլիսում հայտնեց ՀՀ կրթության և գիտության նախարարության Հանրակրթության վարչության պետ Նարինե Հովհաննիսյանը: Նրա խոսքերով, եթե 2008թ.-ին քչերն էին նախընտրում ավագ դպրոցներ հաճախել, ապա այս տարի իրավիճակը կտրուկ փոխվել է, այսինքն` ծնողները գիտակցում են, որ այստեղ իրենց երեխան գտնում է իր իսկական տեղը, որն համընկնում է իր նախասիրություններին և ցանկություններին:

Ըստ Ն.Հովհաննիսյանի, ներկայումս հանրապետությունում գործում է 91 ավագ դպրոց: Այս տարի ավագ դպրոց է ընդունվել 11 հազար աշակերտ: Նշենք, որ հանարպետությունում 9-րդ դասարան ավարտել է 36 հազար աշակերտ: Վարչության պետը տեղեկացրեց, որ ավագ դպրոցներում լուրջ բարեփոխումներ են իրականացվում, դպրոցները հարստացվում են ուսումնանյութական բազայով, համակարգչային սենյակներով և գրադարաններով: Թեև դպոցներում դեռևս կան խնդիրներ` կապված թե ուսուցիչների, թե դասագրքերի հետ, սակայն, Ն.Հովհաննիսյանը վստահեցնում է, որ դրանք ևս աստիճանաբար լուծվում են:

Նա տեղեկացրեց, որ ավագ դպրոցներում դասվանդող ուսուցիչների համար կազմակերպվել են վերապատրաստման դասընթացներ, որից հետո որոշ ուսուցիչներ հրաժարվել են աշխատել ավագ դպրոցներում:
 
«Նրանք գիտակցում են, որ այստեղ մեծ է պատասխանատվությունը, և մենք ավագ դպրոցներում ընդգրկել ենք այն ուսուցիչներին, որոնք կարող են կրել այդ պատասխանատվությունը»,- նշեց Ն.Հովհաննիսյանը` ավելացնելով, որ նախկինում ցածր վարկանիշ ունեցող որոշ դպրոցներ, որոնք վերափոխվել են ավագ դպրոցների, պետք է որակյալ կրթություն ապահովեն. «Մենք թույլ չենք տալու, որ տվյալ դպրոցները շարունակեն իրենց վատ վարկանիշը, քանի որ ավագ դպրոցի վարկանիշը պետք է շատ բարձր լինի»:

Բանախոսի խոսքերով, կարծիք կա, թե պետության ուշադրությունն ավելի շատ ուղղված է ավագ դպրոցներին, իսկ հիմնական դպրոցները մնում են ստվերում: Ըստ նրա, իրենց նպատակը կրթության որակի բարձրացումն է, իսկ ավագ դպրոցում կրթության որակի բարձրացումն անմիջապես ազդեցություն է ունենալու հիմնական դպրոցի վրա:

«Եթե դպրոցներում տարիներ շարունակ 9-րդ դասարանն ավարտելուց հետո չսովորող երեխայի գնահատականները նկարվում էին , ապա այսօր աշակերտները հասկանում են , որ եթե հիմնական դպրոցում լավ չսովորեն, ապա հետագայում չեն կարողանա ուսումը շարունակել ավագ դպրոցում»,- ասաց Ն.Հովհաննիսյանը:

Ասուլիսին ներկա 198 ավագ դպրոցի տնօրեն Արտաշես Թորոսյանի խոսքերով, ավագ դպրոցներում իրականացվող ծրագիրը հասարակության մեջ ձևավորված պատվերի արձագանք է: Դա նշանակում է, որ այստեղ սովորելով` կարիք չի լինի մասնավոր դասուսույցների մոտ պարապել: Ըստ նրա, հիմա այդ ծառայությունը մատուցում է ավագ դպրոցը, և բավականին լավ:

«Ավագ դպրոցների առաջին շրջանավարտների ընդունելության արդյունքները ցույց տվեցին, որ նրանց գնահատականները հանրապետական միջին գնահատականներից բարձր են բոլոր առարկաների գծով: Երեխաներն ավելի լուրջ են մոտենում իրենց ուսմանը: Իսկ այն ուսուցիչները, որոնք փորձել են հին տարբերակով աշխատել աշակերտների հետ, հիմա փոխել են իրենց աշխատանքի ոճը, քանի որ աշակերտը ավագ դպրոցում պահանջում է արդյունք»,- նշեց Ա.Թորոսյանը: