Ձեր վստահելի աղբյուրը

«Голос Армении» թերթը գրում է, որ «Ընդդեմ ռասիզմի եվ անհանդուրժողականության Եվրոպական հանձնաժողովը» (ECRI) սեպտեմբերի 27-ից հոկտեմբերի 1-ը Ադրբեջանում դիտարկում է անցկացրել, որի արդյունքները մոտ ժամանակներս կհրապարակվեն զեկույցի տեսքով: ECRI-ն մի շարք խորհրդատվական առաջարկներ կներկայացնի Ադրբեջանում ռասիզմի, այլատյացության ու անհանդուրժողականության երևույթները վերացնելու ուղղությամբ:

Հոդվածագիրը նշում է, որ Եվրահանձնաժողովի անդամները պետք է ուշադրություն դարձնեն ՀՀ քաղաքացի, հովիվ Մանվել Սարիբեկյանի մահվան փաստին` որպես Ադրբեջանում էթնիկ հանդուրժողականության բացակայության օրինակ: ECRI զեկույցը պետք է արտացոլի այդ հարցում Ադրբեջանում տիրող իրական պատկերը:

Ըստ թերթի, այն 25 օրերը, որ Մանվել Սարիբեկյանն անցկացրել է Ադրբեջանի բանտում, միջազգային օրենքի կոպիտ ոտնահարման եվ պետական մակարդակի հասցված ռասիզմի և այլատյացության ակնառու օրինակներ են:

Թերթը հիշեցնում է, որ 2007 թվականին Հանձնաժողովը հրապարակել էր Ադրբեջանի հարցով զեկույց, որում նշվում էր, թե Ադրբեջանի քաղաքական գործիչներից ու լրատվամիջոցներից շատերը անհանդուրժողականություն են քարոզում երկրի ազգային փոքրամասնությունների հանդեպ:

«Կարող ենք միայն համաձայնվել Եվրահանձնաժողովի հետ, ըստ որի` անհանդուրժողականությունը միայն հայերին չի վերաբերում: Նախորդ զեկույցից հետո Ադրբեջանի բանտերում մահացել են այդ երկրի բնիկ ժողովուրդների կարկառուն ներկայացուցիչներ, ովքեր դատապարտված էին քաղաքական դրդապատճառներով», - նշվում է թերթում:

Հոդվածագիրը նաև նշում է, որ այդ երևույթների ֆոնին Բաքուն չի դադարում սեփական «հանդուրժողականության» ու ազգային փոքրամասնությունների հետ «խնդիրների բացակայության» ցինիկ քաղաքականություն վարել:

Ըստ թերթի, Մանվել Սարիբեկյանի մահվան հանգամանքները բացահայտելու համար անհրաժեշտ է ներգրավել մի շարք միջազգային կազմակերպությունների, առաջին հերթին` ԵԽ Մարդու իրավունքների հանձնակատարին, ով մի քանի օրից այցելելու է Հայաստան: Մեր երկիրը նաև պետք է հետևողականություն ցուցաբերի հարցի բացահայտման ուղղությամբ, անհրաժեշտության դեպքում` նաև դիմի Մարդու իրավունքների եվրոպական դատարան: