Ձեր վստահելի աղբյուրը

«The Beatles» խմբի մենակատարները երգել են խաղաղության և սիրո մասին, բայց պարզվում է նրանց խմբի մենակատարներից մեկը չի ունեցել ոչ մեկը , ոչ մյուսը…

Նա բրիտանական երգիչ և երաժիշտ Ջոն Լենոնն էր...
Մոր վաղաժամ մահը և հարազատ հոր բացակայությունը ստիպել են Լենոնին ժամանակից շուտ մեծանալ և շրջապատի նկատմամբ նրան դարձրել են ագրեսիվ և անտարբեր: Անգամ հարազատների հանդեպ Լենոնը հոգատար չէր: Ծննդատնից իր կնոջը՝ Սինտիային, տուն բերելուց հայտնել էր ,որ ինքը շատ հոգնած է և մեկ շաբաթով մեկնում է հանգստի:

Ինչպես նշում են Լենոնի ընկերները, թեև նա անտարբեր և շատ հաճախ նաև կոպիտ էր շրջապատի մարդկանց նկատմամբ, փոխարենը իր հոգու ողջ սերն ու ջերմությունը արտահայտում էր իր երգերում: Փոլ Մաքքարտնիի հետ Լենոնի գրված առաջին 100 ստեղծագործությունները նվիրված են եղել բացառապես սիրո թեմային:

«Հասունանալ» և միաժամանակ խմբի մյուս անդամներից Լենոնը սկսեց մեկուսանալ ճապոնացի ավանգարդ նկարչուհի Յոկո Օնոյի հետ հանդիպումից հետո: Ի դեպ, հենց այդ կնողջն էին հետագայում շատերը մեղադրում խմբի լուծարման համար:

Լենոնի հարազատները հիշում են, որ կյանքի վերջին տարիներին, Ջոնը վերջնականապես հրաժարվել էր սիրած աշխատանքից և հեռացել երգարվեստից: Թվում էր, թե նա կորցրել է կյանքի հանդեպ ունենած հետաքրքրությունը:

«Մենք ավելի հայտնի ենք դարձել, քան Հիսուս Քրիստոսը: Եվ դեռ հայտնի չէ, ինչը սկզբում կջվերանա՝ կրոնը, թե ռոքնռոլը»,- հնարավոր է, որ Մեսսիայի հետ հենց այս համեմատությունն էլ, որն իրեն թույլ էր տվել Լենոնը հարցազրույցներց մեկի ժամանակ, հետագայում դարձավ նրա մահվան պատճառը:

Մահվանից 2 օր առաջ, Բի Բի Սի-ի լրագրողի հետ զրույցի ժամանակ, պատասխանելով իր անձնական անվտանգությանը վերաբերվող հարցին Լենոնն ասել էր. «Ինձնից 2 տարի պահանջվեց, որպեսզի փողոց դուրս գալուց չվախենամ, որ ինչ որ մեկը կարող է սպանել ինձ: Հիմա ես կարող եմ դուրս գալ այս դռնից և գնալ ռեստորան: Եթե միայն իմանայիր, թե ինչ հաճելի է դա»:
Այս խոսքերով լեգենդար «բիթլը» ավարտեց իր վերջին հարցազրույցը:

Հարցազրույցից 2 օր անց, 1980թ. դեկտեմբերի 8-ի երեկոյան Ջոն Լենոնը Յոկո Օնոյի հետ ձայնագրությունից տուն վերադառնալու ժամանակ, սպանվեց իր երկրպագուներից մեկի՝ Մարկ Չեմպենի ձեռքով: