Ձեր վստահելի աղբյուրը

Իտալացի աշխարհահռչակ սաքսոֆոնահար Մարկո Ալբոնետին հոկտեմբերի 24-ին Երևանում հանդես կգա համերգով: Պետական կամերային նվագախմբի ընկերակցությամբ կայանալիք համերգը տեղի կունենա Արամ Խաչատրյան համերգասրահում: Իսկ հոկտեմբերի 25-ին «Mezzo» ակումբում նա համերգային մեկ այլ ծրագիր կներկայացնի ակումբային երեկոներ նախընտրողներին: Այս մասին Panorama.am-ին տեղեկացնում են Պետական Կամերային նվագախմբից:

Մարկո Ալբոնետին` որպես մենակատար, հանդես է եկել իտալական և միջազգային բազմաթիվ նվագախմբերի հետ, մասնակցել է միջազգային երաժշտական փառատոների: Երաժիշտը Իտալիայում անցկացվող սաքսոֆոնի «Ֆանեզա» միջազգային փառատոնի գեղարվեստական ղեկավարն է:

Ըստ աղբյուրի, «Ֆանեզա»-ն մի փառատոն է, որի շրջանակներում տեղի են ունենում քննարկումներ, սեմինարներ, վարպետության դասեր, իսկ լավագույն ուսանողներն էլ համերգներին մասնակցելու հնարավորություն են ստանում: Սաքսոֆոնի «Ֆաենզա» փառատոնը շատ լայն ճանաչում ունի երաժշտական այդ գործիքը նախընտրողների և սաքսոֆոնի երաժշտության սիրահարների շրջանում:

Մարկո Ալբոնետին երաժշտական կրթություն է ստացել Ռոսինիի անվան կոնսերվատորիայում (Պեսարո, Իտալիա) և Մոցարտի անվան ակադեմիայում (Զալցբուրգ, Ավստրիա), իսկ երաժշտության դոկտորի աստիճանը պաշտպանել է Միչիգանի պետական համալսարանում, որտեղ նրան դասական սաքսոֆոն են դասավանդել Ջեյմս Ֆորգերը և Ջոզեֆ Լուլոֆը, իսկ ջազային սաքսոֆոնի հմտությունները սովորել է Էնդրյու Սպեյթից և Բրենդֆորդ Մարսալիսից:

Գիտելիքների ու տաղանդի ամուր հիմք ունենալով` ներկայումս հենց ինքն է ուսուցանելու և վարպետության դասեր անցկացնելու բազմաթիվ հրավերներ ստանում Եվրոպայի, Միացյալ Նահանգների և Չինաստանի այնպիսի հեղինակավոր համալսարաններից և կոնսերվատորիաներից, ինչպիսիք են` Սանկտ Պետերբուրգի կոնսերվատորիան, Հարթֆորդի համալսարանի Հարթ դպրոցը, Օհայոյի պետական համալսարանը, Միչիգանի պետական համալսարանը, Կիպրոսի երաժշտական դպրոցը, Բեռլինի կոնսերվատորիան:

Երաժշտի համերգային շրջագայությունների աշխարհագրությունը բավականին ընդգրկուն է: Իտալիա, Ֆրանսիա, Ֆինլանդիա, Շվեյցարիա, Գերմանիա, Բելգիա, Իսպանիա, Կիպրոս, Կանադա, Չինաստան և ԱՄՆ. այս երկրներում նա ներկայացրել է իր սաքսոֆոնի կախարդական նվագը: