Ձեր վստահելի աղբյուրը

Նախագահ Սերժ Սարգսյանի և տիկին Ռիտա Սարգսյանի անունից նախօրեին նախագահական նստավայրում, ի պատիվ պաշտոնական այցով Հայաստանում գտնվող Սլովենիայի նախագահ Դանիլո Թյիրկի և տիկին Բարբարա Միկլիչ Թյիրկի, տրվել է պաշտոնական ընթրիք, որի ժամանակ, ընդունված արարողակարգի համաձայն, երկու երկրների նախագահները հանդես են եկել փոխադարձ բաժակաճառերով: Այս մասին տեղեկացնում են նախագահի լրատվական ծառայությունից:

Սլովենիայի նախագահի պատվին տրված պաշտոնական ճաշին Հայաստանի և Սլովենիայի նախագահների ու նրանց տիկնանց հետ, մասնակցել են նաև երկու երկրների պաշտոնական պատվիրակությունների անդամները, հասարակական, քաղաքական, մշակութային, գործարար շրջանակների ներկայացուցիչներ:

Ողջունելով Դանիլո Թյիրկին և նրա տիկնոջը Հայաստանի Հանրապետությունում` Նախագահ Սերժ Սարգսյանն ասել է, որ Սլովենիայի Հանրապետու¬թյան Նախագահի այցը Հայաստանի Հանրապետություն վկայում է երկու երկրների երկկողմ համագործակցությունը զարգացնելու և նոր մակարդակ տեղափոխելու երկուստեք անկեղծ շահագրգռվածության մասին:

Խոսելով Հայաստանի և Սլովենիայի բազմաթիվ ընդհանրությունների մասին` Նախագահ Սարգսյանն ասել է, որ երկու ժողովուրդներին առաջին հերթին միացնում է նույնանման ճակատագիրը, որ ուղեկցվել է պատմական բազմապիսի վայրիվերումներով, պետականության երկարատև կորուստներով, ինքնության պահպանման մաքառումներով և վերջապես, նորագույն պատմության աշխարհաքաղաքական միևնույն գործընթացների արդյունքում անկախության ձեռքբերումով:

Անդրադառնալով եվրոպական արժեքներին Հայաստանի նվիրվածությանը` Նախագահ Սարգսյանը նշել է. «Հայաստան-ԵՄ հարաբերություններն, իրոք, որակական փոփոխու¬թյուն են կրել և դինամիկ զարգանում են` դառնալով ավելի կանոնակարգ¬ված։ Արդեն մեկնարկել են Ասոցացման համաձայնագրի բանակցություն¬ները, աշխատանքներ են տարվում «Խոր և համապարփակ ազատ առևտրի մասին» համաձայնագրի նախապատրաստման ուղղությամբ: Վստահ եմ, որ Սլովենիան, որպես ԵՄ անդամակցության ճանապարհն անցած երկիր, կարող է մեծապես օգտակար լինել այդ խնդիրների լուծման ճանապարհին»։

Կարևորելով տարածաշրջանում կայունության և խաղաղության պահպանումը` Հանրապետության ղեկավարն ասել է, որ տարածաշրջանի բարդ աշխարհաքաղաքական միջավայրը, տնտեսական շրջափակումները և շարունակվող հակամարտությունները դեռևս խոչընդոտում են մեր լիարժեք զարգացմանը: Նախագահն ուրախությամբ արձանագրել է, որ Սլովենիան կարողացավ հարևանների հետ քաղաքակիրթ ձևով հաղթահարել այդ խոչընդոտները` այն քաջ գիտակցումով, որ հարատև պետք է ապրեն կողք-կողքի։ Սերժ Սարգսյանի խոսքով, տարածաշրջանային համագործակցությունը լավագույն միջոցն է մեկտեղելու յուրաքանչյուրի հնարավորությունները և ստեղծելու զգալի ներուժ համընդհանուր առաջընթացի համար:
Նախագահ Սերժ Սարգսյանն իր խոսքն ավարտել է` բաժակ բարձրացնելով ի պատիվ Սլովենիայի Նախագահ Դանիլո Թյիրկի և տիկին Թյիրկի, ի բարօրություն Սլովենիայի Հանրապետության և ժողովրդի, ի փառս հայ-սլովենական համագործակցության:

Սլովենիայի Նախագահ Դանիլո Թյիրկը շնորհակալություն է հայտնել ջերմ և սիրալիր հյուրընկալության համար և նշել, որ իր համար առանձանահատուկ պատիվ է և հաճույք`լինել Սլովենիայի առաջին նախագահը, ով այցելում է Հայաստան: «Սա մեծ իրադարձություն է մեր երկկողմ հարաբերություններում և, հուսով եմ, որ այն կխթանի մեր բարեկամությունը և հիմք կհանդիսանա համագործակցության բազմաթիվ ոլորտներում նոր նվաճումների հասնելու համար»,-ասել է Նախագահ Թյիրկը:
Խոսելով Հայաստանի ու Սլովենիայի ժողովուրդների պատմական նմանությունների մասին, Նախագահ Թյիրկն ասել է. «Պատմության ընթացքում մեր երկու ժողովուրդներն անցել են դժվարին փորձությունների միջով և տառապել օտարերկրյա լծի տակ, սակայն մեզ հաջողվել է պահպանել ամուր ազգային ինքնությունը` փայփայելով մեր լեզուն ու մշակույթը»:

Սլովենիայի Նախագահը վստահություն է հայտնել, որ երկու երկրների երկկողմ ավելի արդյունավետ համագործակցության համար առկա են բոլոր նախադրյալները ոչ միայն փոխադարձ հետաքրքրություն ներկայացնող բնագավառներում, այլև միջազգային կազմակերպություններում խորացված երկխոսության համար:

Նախագահ Թյիրկի խոսքով, Հայաստանը գրավում է հետաքրքիր աշխարհագրական դիրք և ունի չօգտագործված տնտեսական ներուժ և այդ պատճառով, գրավիչ գործընկեր է ԵՄ-ի համար. «Որպես ԵՄ-ի անդամ, Սլովենիան ակտիվ կերպով մասնակցում է Արևելյան գործընկերության նման նախաձեռնությունների մշակմանն ու սատարում դրանց իրականացմանը: Ակնկալում ենք, որ խորացված քաղաքական համագործակցության և ավելի բարձր մակարդակի տնտեսական ինտեգրման միջոցով, Ասոցացման պայմանագիրը Հայաստանի և ԵՄ-ի միջև կարտացոլի երկու կողմերի իրական շահերը և համագործակցության կարողությունները հաջորդ փուլում: Հայաստանի և ԵՄ-ի միջև համագործակցությունը խթանելու ճանապարհին, Սլովենիան միշտ պատրաստ է աջակցել իր հայ բարեկամներին»,-ընդգծել է նա:

Սլովենիայի Նախագահն իր խոսքը եզրափակել է Հայաստանի զարգացմանն ու բարգավաճմանը, ինչպես նաև երկու երկրների միջև ջերմ ու բարեկամական հարաբերությունների զարգացմանն ուղղված բարեմաղթանքներով: