Ձեր վստահելի աղբյուրը

Այսօր կրթության և գիտության նախարարը հրաման է ստորագրել է «Սոցիալապես անապահով երեխաներին ՀՀ պետական ուսումնական հաստատությունների կողմից անվճար տրվող դասագրքերի դիմաց փոխհատուցման ենթակա գումարների մասին»:

Նախարարության մամուլի ծառայությունից պարզաբանում են, որ համաձայն հրամանի` պետական ուսումնական հաստատություններում սոցիալապես անապահով ընտանիքների երեխաներին անվճար տրվող դասագրքերի դիմաց փոխհատուցման ենթակա գումարների հաշվարկը կիրականացվի 2010-2011 ուստարվա սկզբի դրությամբ սովորողների թվաքանակին` ըստ դասարանների և համապատասխան դասարանի դասագրքերի ամբողջական խմբաքանակի դիմաց ներդրվող գումարին համամասնորեն:

«Դասագրքերի շրջանառու հիմնադրամին» հանձնարարվել է իրականացնել յուրաքանչյուր ուսումնական հաստատությանը վճարման ենթակա գումարների հաշվարկը և մինչև սույն թվականի հոկտեմբերի 30-ը ներկայացնել այն նախարարություն:
Բացի այդ, «Դասագրքերի շրջանառու հիմնադրամին» հանձնարարվել է մշակել և մինչև սույն թվականի նոյեմբերի 12-ը նախարարություն ներկայացնել համաձայնեցման` պետական հանրակրթական հաստատությունների և ԿԳ նախարարության աշխատակազմի միջև կնքվելիք պայմանգրի ձև, որով կսահմանվեն հանրակրթական հաստատություններում սոցիալապես անապահով ընտանիքների երեխաների ընտրության և վերջիններիս անվճար դասագրքեր տրամադրելու պայմանները:

Նախարարի այս հրամանը միտված է անապահով ընտանիքների սոցիալական բեռի թեթևացմանը, հանրակրթական դպրոցներում, անկախ ընտանիքի սոցիալական դրությունից, բոլոր աշակերտների համար որակյալ կրթություն ստանալու համար անհրաժեշտ ու հավասար պայմանների ապահովմանը: