Ձեր վստահելի աղբյուրը

«Առավոտ»-ը տեղեկացնում է, որ Ստեփանակերտում անցկացվող Լրագրողների համահայկական 5-րդ համաժողովի մասնակիցները հյուրընկալվել են ԼՂՀ ԱԺ նախագահ Աշոտ Ղուլյանին: Խոսելով այն մասին, որ Արցախի մամուլն իներտ է և ՀՀ-ի ու սփյուռքի համեմատ թույլ օղակ է` Ա. Ղուլյանը նշել է. «Եթե դուք էլ լինեիք որոշում կայացնողը, դուք էլ կընտրեիք սկզբում սոցիալական խնդիրները լուծելու ճանապարհը` դպրոց կառուցել, հիվանդանոց, բնակարան և այլն, հետո նոր տեղեկատվական դաշտը մեծացնել, հզորացնել»:

Մեկնաբանելով ԼՂ-ի անկախության ճանաչման մասին ՀՀ ԱԺ-ում կայացած քննարկումները` Ա. Ղուլյանը նշել է. «Մենք չենք ուզում ԼՂ միջազգային ճանաչումը բաժանել երկու մասի` Հայաստանի կողմից և մյուսների: Եթե որևէ մեկն ասի, որ Հայաստանի կողմից ճանաչումը կարող է միջազգային ճանաչման համար լավ սկիզբ լինել` շատ լավ, բայց չէի ցանկանա հուզականությունը խառնել սթափ հեռատեսությանը: Աշխարհում նորանկախ պետությունների ճանաչումները միշտ եղել են ոչ թե միջազգային իրավունքին համապատասխան, այլ` ելնելով քաղաքական նպատակահարմարությունից»: Ադրբեջանի հետ հակամարտության մեջ որևէ փոխզիջման մասին ԱԺ նախագահը խոսել չի ցանկացել. «Քանի դեռ Ադրբեջանը չի գնում որևէ բանակցության և փոխզիջման` մենք չենք կարող մտնել այդ խոսակցությունների մեջ: Երբ զգանք, որ հակառակորդը պատրաստակամ է փոխզիջումների, այն ժամանակ կխոսենք այդ մասին, իսկ փոխզիջումների սահմանը որոշելու է միայն և միայն ԼՂՀ ժողովուրդը»:

Թերթը ներկայացրել է Ստեփանակերտում մեկնարկած լրատվամիջոցների 5-րդ համաժողովում արծարծված մի շարք խնդիրներ: «Ազգ» թերթի խմբագիր Հակոբ Ավետիքյանն անդրադարձել է Հայաստանի, Սփյուռքի և Արցախի լրատվամիջոցներին` նկատելով, որ դեմ է, որ ողջ մամուլը նույնալեզու լինի, սակայն կան հարցեր, որոնց վերաբերյալ ողջ մամուլը պիտի նույն ալիքի, նույն հաճախականության վրա լինի: Գոհունակություն հայտնեց, որ Սփյուռքում արդեն ազատորեն դիտում են մի քանի հայաստանյան TV-ներ, սակայն ցավով փաստեց, որ այն ինչ դիտում են, ամենևին էլ գոհունակության տեղիք չի տալիս: Հայաստանյան հեռուստաընկերությունների աշխարհասփյուռ ծրագրերին է անդրադարձել նաև Իսպանիայի «Հայրենիք» շաբաթաթերթի խմբագիր Արարատ Ղուկասյանը` ասելով, որ դրսի հայերը շատ ավելի կարիք ունեն մանկական, գիտամշակութային փաստավավերագրական հաղորդումների, քան լատինաամերիկյան սերիալների: