Ձեր վստահելի աղբյուրը

ԱԺ-ի այս օրակարգում է «Լեզվի մասին» և «Հանրակրթության մասին» օրենքներում փոփոխություններ նախատեսող նախագիծը` այն քննարկվելու և քվեարկվելու է երկրորդ ընթերցմամբ: Նախագծի վերաբերյալ առաջին իսկ օրվանից ընդդիմադիր դիրքերից հանդես եկած Դաշնակցությունն այսօր էլ ասելիք ունի, քանի որ եթե օրենքներում փոփոխություն է արվում, ապա դա առաջին հերթին պետք է արվի ի նպաստ ազգային դպխրոցի: Սա, մասնավորապես, ՀՅԴ-ական Լիլիթ Գալստյանի կարծիքն է.
«Ամրագրված է, թե ազգային դպրոցը մեզ համար գերակայություն է, սակայն տվյալ նախագծով ոչ թե սրանում ենք համոզվում, այլ նրանում, որ փոփոխությունները սպասարկելու են կոնկրետ գործարարի շահերը և ընդամենը քաղաքական պատվերի հետ գործ ունենք»,- Panorama.am-ին ասաց պատգամավորը:

Այն մասին, որ խնդիրը քաղաքական պատվեր լինել-չլինելն է ու որ կոնկրետ գործարարին խոսք է տրվել և այժմ էլ ամեն բան արվում է այդ խոստումը կյանքի կոչելու համար բազմիցս է խոսվել: Բայց ապրիլին առաջին անգամ հանրության դատին հանձնված նախագիծը, Լ.Գալստյանի խոսքերով, բավականին շատ է մուտացիայի ենթարկվել և այսօր ունենք մի պատկեր, երբ նախագծի խորհրդարան մտնելու ժամանակ հնչեցված հիմնավորումն ու նախագծի, փաստորեն, վերջնական տեսքն իրար հետ որևէ առնչություն չունեն. «Քաղաքական կույր համառությամբ պարզապես փորձ է արվում դարպասները բացել Դիլիջանի դպրոցի համար և որևէ մեկը չի կարողանում հստակ պարզաբանել մի շարք հարցեր` ինչո՞ւ 11 դպրոց, ինչո՞ւ Դիլիջանում և Ջերմուկում և այլն»,- նշեց Լ.Գալստյանն ավելացնելով` շեշտադրումներն են սխալ:

Սակայն այս ամենի հետ մեկտեղ ակնհայտ է, որ նախագիծը կքննարկվի հենց այս շաբաթ ու ամենայն հավանականությամբ` կընդունվի երկրորդ ընթերցմամբ: Ի՞նչ է անելու խորհրդարանական ընդդիմությունը` ի դեմս ՀՅԴ-ի, բացի նրանից, որ բարձրաձայնելու է, թե քանի ամիս շարունակ պայքարել է նախագծի դեմ:

Լ.Գալստյանը հարցադրմանն ի պատասխան, նախ, տեղեկացրեց, որ օրերս արդեն քննարկումն է, բայց լրամշակված տարբերակը, որի մասին անցած շաբաթ ասել էր ԿԳ նախարար Արմեն Աշոտյանը, դեռ իրենց ներկայացված չէ:

Ինչ վերաբերում է ընդունվել-չընդունվելուն, ապա պատգամավորը, բացի նրանից, որ վստահություն հայտնեց, թե քաղաքական պատվերը ի կատար կածվի, հետագա քայլերից այդպես էլ չխոսեց. «Ցավոք, մեր երկիրը կառավարվում է մեկ կոճակի ու մեկ անձի սկզբունքով ու թեև պայքարողնեորի առանձին բանակներ ունենք` մեկը պայքարում է բնապահպանական, մյուսները կրթական խնդիրների դեմ և այլն, այդուհանդերձ մարդու իրավունքները համատարած ոտնահարվում են և հասարակությունն ի վերջո պետք է հասկանա, որ պետք է լինի ավելի պահանջատեր ու ամեն վայրկյան այս իշխանության թիկունքում զանգը գուժի»: