Ձեր վստահելի աղբյուրը

Այս տարի հանրապետության տարածքի որսահանդակներում, բացի հատուկ պահպանվող տարածքներից, գայլի ու շնագայլի որսն անսահմանափակ է: Իսկ որսի սիրահարները, նոյեմբերի 1-ից կարող են որսալ վայրի խոզ, նապաստակ, քարակաքավ, կզաքիս, գայլ ու շնագայլ` բնապահպանության նախարարի` 2010 թվականի որսի շրջանի վերաբերյալ հրամանի համաձայն:

Panorama.am-ի թղթակցի հետ զրույցում նախարարության տեղեկատվության և հասարակայնության հետ կապերի բաժնի պատասխանատու Արծրուն Պեպանյանը ևս մեկ անգամ հիշեցրեց` «ոսկե, սակայն հաճախ խախտվող կանոնն է` որսը թույլատրվում է հանրապետության տարածքի որսահանդակներում` բացառությամբ բնության հատուկ պահպանվող տարածքներից»:

Այսպես, այս տարի նախարարի հրամանի համաձայն, նոյեմբերի 15-ից մինչև 2011 թվականի փետրվարի 28-ն ընկած ժամանակահատվածում անսահմանափակ որսի թույլտվություն կա գայլի ու շնագայլի նկատմամբ, նույն ժամկետում թույլատրվում է մինչև 500 հատ կզաքիսի որսը` յուրաքանչյուր որսի ժամանակ 2-ից ոչ ավել քանակով, մինչև 2 հազար հատ աղվեսի որսը` յուրաքանչյուրի որսի ժամանակ 10 հատ:

Այս տարվա նոյեմբերի 1-ից, մինչև դեպտեմբերի 31-ը թույլատրվում է մինչև 3 հազար հատ Քարակաքավի որսը` յուրաքանչյուրի ժամանակ 5-ից ոչ ավելի: Իսկ նոեյեմբերի 1-ից մինչև հաջորդ տարվա հունվարի 31-ը, յուրաքանչյուր որսին 2 հատից ոչ ավելի քանակով, որսորդները կարող են մինչև 500 նապաստակի որս կատարել: Վայրի խոզի սիրահարների համար նշված է 2010-ի նոյեմբերի 1-ից մինչև 2011թվականի փետրվարի 28-ն ընկած ժամանակահատվածը, թույլատրվում է մինչև 50 հատ խոզի որս` յուրաքանչյուր օրը 1 հատ:

Panorama.am-ի հետ զրույցում հանրապետության Որսորդմիության ղեկավար Վարդգես Խաչատրյանը նկատեց, որ որսորդները, սովորաբար, նախապատվությունը տալիս են վայրի խոզի որսին: Իսկ այս կենդանու որսի համար, որսի ողջ շրջանում, որսորդը պետք է վճարի 50 հազար դրամ: Վայրի խոզին, ըստ նախապատվության, հաջորդում է գայլի, շնագայլի ու աղվեսի որսը: Այս կենդանիների որսի համար նախատեսված վճար չկա: Սա, Վ. Խաչատրյանը բացատրեց նրանով, որ նրանք այնքան շատ են` նույնիսկ անտառամերձ գյուղերի բնակիչներին են անհանգստություն պատճառում:

Նշենք, որ այս տարի ավարտվել է լորի, աղավնու` թխակապույտ ու անտառային, տատրակի, կտցարների` բառացությամբ կարմիր գրքում գրանցվածների, սովորական սարյակի, արտույտների` դաշտային և տափաստանային, կեռնեխների` սև և սինակեռնեխ, մեղվակերի թույլատրելի որսի շրջանը:

Ի դեպ, նշենք, որ hունվարի 1-ից մայիսի 6-ն ընկած ժամանակահատվածում Հայաստանի Հանրապետությունում արձանագրվել է որսագողության 4 դեպք, որոնք բացահայտվել են:
Հիշեցնենք, որ 2009 թվականին հանրապետությունում Հայտնաբերվել է խախտման 80 դեպք, որից 4-ի համար հարուցվել է քրեական գործ և տրվել է համապատասխան ընթացք: Կազմվել է վարչական տուգանքի 71 ակտ 2730,0 հազ. դրամի չափով: 54 դեպքի համար հաշվարկվել է բնությանը պատճառած վնասի հատուցում` 10530,0 հազ. դրամի չափով: Առգրավվել է 2927 հատ տարբեր տեսակի ապօրինի որսված ձուկ , 4 որսորդական նավակ, 3 հատ որսորդական հրացան: