Ձեր վստահելի աղբյուրը

Տավուշի ու Գեղարքունիքի մարզերի մի քանի դպրոցներում հոկտեմբերի 1-ից մեկնարկած «Դպրոցական սնունդ» ծրագրի իրականցման վերաբերյալ արդեն բողոքներ կան: Պարզվում է` սոցիալական բեռի թեթևացմանն ուղղված այս ծրագրի շրջանակում դպրոցում կերակուր պատրաստելու համար կամ ծնողից են սնունդ պահանջում կամ էլ շաբաթական կտրվածքով երեխաներից փող են ուզում` 500 դրամ:

Օրերս խմբագրություն զանգեց Սևան քաղաքի մի բնակչուհի, նրա երեք երեխաները սովորում են Սևանի թիվ 3 միջնակարգ դպրոցում: Հոկտեմբերի 1-ից այդ ու քաղաքի ևս մի քանի դպրոցում մեկնարկել է ծրագիրը: Դպրոցում դրա իրականացմանը հենց սկզբից ընդդիմացող ծնողներից, ըստ անուն-ազգանունը բացահայտել չցանկացած ծնողի պատմածի, նախ սպասք են ուզել, թավաներ, դանակ-պատառաքաղ, կաթսաներ, հիմա էլ` հնդկաձավար, մակարոն, կարտոֆիլ ու այլ բանջարեղեներ` կերակուր պատրաստելու համար:

Գանք սկզբից. դժգոհելու համար, ինչպես պարզվեց, այդ դպրոցում շատ բան կա: «Դպրոցում ջուր չկա, երեխաները ոչ ուտելուց առաջ են լվացվում, ոչ էլ հետո: Երկրորդ` աշխատողներից ոչ մեկը սանիտարական զննում չի անցել, խոհանոցում էլ ջուր չկա: Եվ երրորդ, եթե ծրագիրը հաստատել են, ինչո՞ւ են մեզանից ուտելիք ուզում: Ասում են, գումար հավաքեք, կարտոշկա առեք, մակարոնեղեն, գրեչկա, մի խոսքով, ինչ կկարողանաք, առեք, բերեք, որ ձեր երեխաների համար ճաշ պատրաստենք»,-դժգոհություններն ու մտահոգությունները ներկայացրեց մեր զրուցակիցը, նշելով, որ պահանջը երեխաներին ներկայացնում են ուսուցիչները, նրանց էլ` տնօրեն Լիլյա Սարգսյանը:

«Խնդրում ենք, հավաքեք, գումարը բերեք, որ ավելորդ խոսակցություններ չլինեն»,-սա ուսուցիչների խնդրանքն է երեխաներին, ովքեր անընդհատ իրենց «խաթրից» են խոսում: «Ծնողը ունենա էդ ուտելիքը, կպատրաստի, երեխան կգա տանը կուտի այդ նույն ուտելիքը: Ինչո՞ւ պետք է այդ ուտելիքը բերի դպրոց, որ անմխիթար պայմաններում պատրաստեն: Ամեն օր գնում ենք դպրոց ու բարկացած վերադառնում»,-ասաց նա:

ԿԳՆ արտաուսումնական դաստիարակության բաժնի պետ Անդրանիկ Հովհաննիսյանը Panorama.am-ի թղթակցի հետ զրույցում պարզաբանեց, որ ծրագիրն իրականացվում է ՄԱԿ-ի Պարենի համաշխարհային ծրագրի կողմից, որտեղից իրեն բացատրել են, որ 3-4 անուն սնունդ ապահովում է ՄԱԿ-ը, մնացածը, որպեսզի սննդակարգը հագեցած լինի, նախատեսվում է կտրամադրվի երեխաների կողմից: ՄԱԿ-ում տեղյակ են, որ շատ քիչ դպրոցներում մեկ երեխայի համար ամսական 500 դրամ են վերցնում ծնողից:

ԿԳՆ աշխատակցի խոսքով, մինչ ծրագրի մեկնարկը ուսումնասիրություններ են արվել, ջրի խնդիրն է դիտարկվել, նա նաև կարծիք հայտնեց ու բայց չպնդեց, որ կերակուր պատրաստող աշխատակիցները սանիտարական զննում անցել են: «Եթե ծնողը չի ցանկանում, թող երեխան չմասնակցի ծրագրին»,-առաջարկեց Ա. Հովհաննիսյանը: Ըստ նրա, ծրագրի իրականացմանը նախարարության աշխատակիցները հետևում են, ԿԳՆ-ն պատրաստվում է նույնիսկ հուշագիր ստորագրել` ծրագրի կատարման համար իրավական հիմք ապահովելու համար: Ա. Հովհաննիսյանը խոստացավ, որ ջրի ու գումար հավաքելու խնդրին ծանոթանալու համար նշված դպրոց ԿԳ ներկայացուցիչներ կմեկնեն: Խոստացավ նաև արդյունքների մասին տեղյակ պահել խմբագրությանը:

Դպրոցական երեք երեխաների մայրը նաև բողոքում է, որ դպրոցը «առևտրի կենտրոն» են դարձրել: Ամեն անգամ միջոցառումների տոմսեր են վաճառում ու երեխաներին ստիպում գնել: Այս պահին էլ կրկեսային համարի տոմսեր են վաճառում, երկու հոգու համար` 1000 դրամ: Ներկայացումը նախատեսված է հոկտեմբերի 29-ին:

«Մեր մարզում գործազրկությունը ահավոր մակարդակի վրա է: Մարդիկ կային, ասել են, որ ի վիճակի չենք տոմս գնել: Ասում են, եթե միջոցառմանը չես ուզում գալ, գումարը տուր, դու մի արի: Ամեն ինչը ստիպողաբար է արվում»,-իրավիճակն այսպես ներկայացնում է Սևանի բնակչուհին, ապա ավելացնում, որ այս ուսումնական տարվա մեկնարկից հետո մի քանի անգամ գումար են հավաքել` դպրոցի համար հոսանքալար, փական, կավիճ, հատակը փայլացնող նյութ, A4 ֆորմատի թուղթ առնելու համար: Հիմա էլ մի դասասենյակի վերանորոգման համար յուրաքանչյուր աշակերտից 5 հազար դրամ են պահանջում:

«Կավիճի փող հավաքե՞լ… հնարավոր չէ: Եթե որևէ դպրոցի անուն տաք, որ կավիճի փող են հավաքել...»,-ԿԳՆ հանրակրթության վարչության պետ Նարինե Հովհաննիսյանի այս արձագանքը թողեցինք կիսատ` ընդգծելով. «Սևան քաղաքի թիվ 3 միջնակարգ դպրոց»:

«Դե ուրեմն զանգեք այնտեղի վարչություն»,-տոնը փոխեց ու դիրքերը զիջեց վրդովված պետը: Ինչ վերաբերում է դասասենյակի վերանորոգման համար պահանջվող գումարին, Ն. Հովհանիսյանի կարծիքով, խոսքը կամավոր սկզբունքով դրամահավաքության է վերաբերում: «Կարողանում են տան, չեն կարողանում, թող չտան»,-իրավիճակը, ըստ իր պակերացրածի, ներկայացրեց վարչության պետը, իսկ երբ նկատեցինք, թե կամավոր սկզբունքից դժվար թե ծնողը բողոքեր ու խմբագրություն զանգահարեր, Հովհաննիսյանն այս անգամ էլ խորհուրդ տվեց ծնողին խնդիրը ներքին կարգով տնօրենի հետ լուծել:

Ի դեպ, նպաստառուների ցուցակում ընդգրկված այս ընտանիքի երկու երեխան տարրական դասարանի սաներ են` 2-րդ և չորրորդ դասարան: Նրանք ինչ-որ մեկից լսել են, որ եթե նպաստառու ընտանիքի 3 երեխաներ աշակերտ են, ապա մեկի գրքերն անվճարեն: Երբ նկատեցինք, թե ԿԳ նախարարը հայտարարել է, որ տարրական դպրոցներում բոլոր դասագրքերը անվճար են տրամադրվելու, կինն արձագանքեց, որ երկու գրքի համար վճարել են: Ն. Հովհաննիսյանը Panorama.am-ի թղթակցի հետ զրույցում տեղեկացրեց, որ բացառությամբ երկու գրքի, որոնց համար պետք է վճարել` երգ-երաժշտության ու օտար լեզվի: «Մենք լրացուցիչ տեղակացրել ենք այդ մասին»,-ասաց վարչության պետը: Նշենք, որ ծնողի խոսքով, իրենք հենց այդ դասագրքերի համար են վճարել:

ԿԳՆ պաշտոնական կայքէջում «Դպրոցական սնունդ» ծրագրի վերաբերյալ տեղեկատվության համաձայն, ծրագիրը ֆինանսավորվում է ՌԴ կողմից, հավակնում է դառնալ պետական: Մշակվելու է դպրոցական սննդի ազգային ռազմավարություն, որը կյանքի կկոչվի 2013 թվականից և միտված կլինի ՀՀ առնվազն տարրական դասարանների բոլոր աշակերտներին համապատասխան դպրոցական սննդով մատակարարմանը:

Ըստ այդ տեղեկատվության, 8 միլիոն ԱՄՆ դոլար արժողությամբ դպրոցական սնունդ եռամյա ծրագրի նպատակն է բարելավել դպրոցականների սնուցման վիճակը` նպաստելով տարրական դասարանի դպրոցականներ ունեցող ընտանիքների սոցիալական բեռի թեթևացմանը։ Ծրագրի շրջանակում ընդգրկված 1-4-րդ դասարանցիներին օրական մեկ անգամ կտրվի տաք կերակուր։ Նախնական փուլում ծրագրից կօգտվի Տավուշի և Գեղարքունիքի մարզերի դպրոցների շուրջ 12.500 աշակերտ: Հետագայում նախատեսվում է ընդգրկել նաև Լոռու, Շիրակի, Արմավիրի և Արագածոտնի մարզերի դպրոցները։ Հիմնական փուլում ծրագրից կօգտվի արդեն շուրջ 50.000 դպրոցական։