Ձեր վստահելի աղբյուրը

Տեղեկատվական տեխնոլոգիաների ոլորտում ՀՀ նախագահի ամենամյա կրթական պարգևի հանձնման արարողության ժամանակ «Սինոփսիս Արմենիայի» տնօրեն Հովիկ Մուսայելյանը, կարևորելով միջոցառման անցկացումը, նշեց, որ ՏՏ բնագավառում մրցանակաբաշխության հիմնական նպատակն է բացահատել և խրախուսել տեխնիկական ուղղվածությամբ հայկական կրթական համալիրների լավագույն ուսանողներին և աշակերտներին:

«Այս տարիների ընթացքում մենք ունեցել շուրջ 115 հաղթող ուսանող և 40 աշակերտ: Նրանց մասնակցությամբ ձևավորվել է նաև հաղթողների ակումբ և նրանք պարբերաբար հանդիպում են ոլորտի առաջատար մասնագետների հետ: Սա բացառիկ մրցանակաբաշխություն է: Աշխարհի ոչ մի երկրում երկրի նախագահի կրթական պարգև ՏՏ ոլորտում ուսանողների և աշակերտների համար չկա»,- նշեց Հովիկ Մուսայելյանը:

Նշենք, որ նախագահի մրցանակին արժանացած 37 երիտասարդներից 25-ը տարբեր բուհերի ուսանողներ են, 12-ը՝ ավագ դպրոցի աշակերտներ :

Լավագույն ասպիրանտ անվանակարգում առաջին կարգի մրցանակի արժանացան ՀՊՃՀ ուսանող Վահրամ Ահարոնյանը, ԵՊՀ-ից Գևորգ Գևորգյանը և ՌՀՀ-ից Բելլա Բաբայանը:

Լավագույն մագիստրանտ անվանակարգում առաջին կարգի մրցանակի արժանացան ԵՊՀ-ից Արմեն Դուրգարյանը, ՌՀՀ-ից Էդուարդ Փիլիպոսյանը և ԵՐԻԿՏԱ-ից Սուսաննա Քալանթարյանը:

Լավագույն բակալավր անվանակարգում առաջին կարգի մրցանակի արժանացան
ՀՊՃՀ-ի ուսնողուհի Նազելի Մելիքյանը, ԵՊՀ ուսանող Ներսես Խաչատրյանը, ԵՐԻԿՏԱ-ի ուսանողուհի Անահիտ Սերոբյանը և ՌՀՀ ուսանող Հայկ Սարիբեկյանը:
Լավագույն սփյուռքահայ ուսանող անվանակարգում առաջին կարգի մրցանակին արժանացավ ՀԱՀ ուսանող Արամ Քեռյանը:

Լավագույն ուսանողուհի ճանաչվեց ԵՊՀ-ի ուսանողուհի Դիանա Անտոնոսյանը:
Իսկ գրան-պրի մրցանակը հանձնվեց ՀՊՃՀ ասպիրանտ Արմեն Ղարիբյանին:

Մրցանակը ստանալուց հետո նա խոստովանեց, որ ամեն անգամ նմանատիպ մրցանակաբաշխությունների ժամանակ հույսը դնում է նախ աստծո, ապա իր գիտելիքների վրա:

«Արդեն 6 տարի աշխատում եմ այս ոլորտում և սա իմ 3-րդ մրցանակն է: Առաջին մրցանակը ստացել էի լավագույն բակալավր անվանակարգում, երկրորդը՝ լավավույն մագիստրոս: Այսօր արժանացա գրան-պրիին: Այս մրցանակն ինձ ավելի է պարտավորեցնում, որպեսզի ես իմ ներդրումն ունենամ ՀՀ ՏՏ ոլորտի զարգացման հարցում»,- նշեց Արմեն Ղարիբյանը:

Տեղեկատվական տեխնոլոգիաների ոլորտում հաջողություն արձանագրած ուսանողները և աշակերտները, վկայագրի և դրամական պարգևի հետ միասին, ստացան նաև ՏՏ արդյունաբերությունը խորհրդանշող արձանիկ: