Ձեր վստահելի աղբյուրը

Հանրային ծառայությունները կարգավորող հանձնաժողովը (ՀԾԿՀ) այսօր բավարարել է ՎիվաՍել-ՄՏՍ ընկերության 4G LTE (Long Term Evolution) տեխնոլոգիայի ներդրմամբ շարժական ռադիոկապի ցանցի կառուցման մասին դիմումը և համապատասխան թույլտվություն շնորհել մինչև 2019 թվականի նոյեմբերի 4-ը 40ՄՀց լայնությամբ` Երևանում 2500-2520 և 2620-2640, իսկ մարզերում` 2600-2640 ռադիոհաճախականությունների հատվածների օգտագործման համար: Այս մասին տեղեկացնում են ընկերության լրատվական ծառայությունից:

Հանձնաժողովի որոշման համաձայն, ՎիվաՍել-ՄՏՍ-ը պարտավորվում է իրականացնել LTE ցանցը կոմերցիոն գործարկումը մինչև 2011 թվականի մարտի 1-ը:

Ըստ տեղեկատվության, 2010-ի կեսից սկսած, հեռահաղորդակցության տեխնոլոգիաների ոլորտում աշխարհի առաջատար մատակարարների և սարքավորումեր արտադրողների հետ համատեղ, ՎիվաՍել-ՄՏՍ-ը ֆունկցիոնալ փորձարկումներ էր իրականացնում` ցանցի աշխատանքի առանձնահատկությունները և վերջնական սպառողին մատուցվող ծառայության որակն ուսումնասիրելու և գնահատելու նպատակով: Մինչև 2010 թվականի դեկտեմբերի 1-ը, ՎիվաՍել-ՄՏՍ-ը Երևանի կենտրոնում կգործարկի 4G LTE համակարգի հատուկ փորձարարական գոտի: Փորձարարական գոտի ստեղծելու նպատակը իրական պայմաններում 4G ցանցի ապահոված արագության, ցանցի ներսում բջիջից բջիջ սահուն անցման (handover) կայունության և որակական այլ հատկանիշների ստուգումն է` նախքան 2011թ. փետրվարի վերջում կամ մարտի սկզբում այդ գերարագ ցանցի լիարժեք կոմերցիոն մեկնարկը: Նախնական փուլում 4G LTE ցանցը կոմերցիոն հիմունքներով հասանելի կլինի Երևանում, սակայն հետագայում ծածկույթը կընդլայնվի` ընդգրկելով հանրապետության մյուս հիմնական քաղաքներն ու այլ շրջանները:

LTE-ն 4-րդ սերնդի շարժական ռադիոկապի տեխնոլոգիա է: 4G LTE-ն համարվում է հաջորդ սերնդի բջջային լայնաշերտ կապի տեխնոլոգիա, որը հաջորդում է արդեն իսկ լայնորեն կիրառվող 3.5G/HSPA և HSPA+ տեխնոլոգիաներին: Իդեալական պայմաններում այն ապահովում է տվյալների փոխանցման մինչև 100 Մբիթ/վրկ արագություն` բազային կայանից դեպի բաժանորդի ընդունող սարքը և մինչև 50 Մբիթ/վրկ արագություն` բաժանորդի ընդունող սարքից մինչև բազային կայան:

Իրական պայմաններում, 3G տեխնոլոգիաների համեմատությամբ, 4G տեխնոլոգիան թույլ է տալիս ստանալ ներբեռնման և վերբեռնման մոտ 10 անգամ ավելի բարձր արագություն:

«ՎիվաՍել-ՄՏՍ-ի LTE ցանցի ներդրման շնորհիվ Հայաստանը կդասվի 4G ցանց ներդրած հազվագյուտ երկրների շարքին: Հեռահաղորդակցության տեխնոլոգիաների սրընթաց զարգացումը ժամանակը դարձնում է ապագայում հաջողության հասնելու կարևորագույն գործոն: Շատ շուտով մենք կազդարարենք մեծ հեռանկարներ խոստացող LTE տեխնոլոգիայի` 4-րդ սերնդի ցանցի ներդրումը: Հեռահաղորդակցության ոլորտի ամենաարդիական և նորարարական տեխնոլոգիաների կիրառումը մեր բաժանորդներին կտա մրցակցային մեծ առավելություն: Ինչպես և երկրի բնակելի տարածքի մոտ 94%-ում ծածկույթ ապահովող 3.5G ցանցի դեպքում, ՎիվաՍել-ՄՏՍ-ի LTE` 4-րդ սերնդի ցանցը հասանելի կդառնա Հայաստանի ողջ բնակչությանը»,- նշել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը