Ձեր վստահելի աղբյուրը

«Հայաստանում միջուկային և ճառագայթային անվտանգությունը գտնվում է այնպիսի մակարդակի վրա, ինչպիսին պահանջում են միջազգային ստանդարնտները»: Այս մասին այսօր կայացած ասուլիսում հայտարարեց  ՀՀ կառավարությանն առընթեր միջուկային անվտանգության կարգավորման պետական կոմիտեի նախագահ Աշոտ Մարտիրոսյանը:

Ըստ նրա, հոկտեմբերի 15-ին ատոմակայանի երկրորդ էներգաբլոկը ժամանակավորապես դադարեցրեց աշխատանքը` պլանային նորոգման, ինչպես նաև անվտանգության մի շարք միջոցառումների իրականացման համար: Այդ աշխատանքները ուղղված են նրան, որպեսզի ատոմակայանը աշխատի անվտանգ, հուսալի և մատակարարի անխափան էլեկտրաէներգիա:

Ա. Մարտիրոսյանի գնահատմամբ, ատոմակայանի անվտանգության մակարդակը տարեցտարի բարձրանում է համաձայն ատոմակայանի տեխնիկական անվանգության բարձրացման միջացառումների ծրագրով: Եւ դա, ըստ նրա, պետք է շարունակվի մինչև ատոմակայանի շահագործումից հանելը:

Կոմիտեի նախագահը նշեց, որ անցած շաբաթ Սլովակիայում տեղի է ունեցել Արևմտյան Եվրոպայի միջուկային անվտանգությունը կարգավորող մարմինների հանդիպումը, որի ժամանակ քննարկվել են միջուկային անվտանգության հարմոնիզացիայի հարցերը:

Ներկայումս ՄԱԳԱՏԷ-ի անվտանգության ստանդարտների հիման վրա մշակված են 18 անվտանգության չափանիշներ, որոնք հետագայում կկիրառվեն Արևմտյան Եվրոպայի երկրներում, ինչպես նաև վերջերս այդ միության դիտորդի կարգավիճակ ստացած Հայաստանը, Ռուսաստանը, Ուկրաինան: Դա նշանակում է, որ հաջորդ տարի Արևմտյան Եվրոպան կունենա անվտանգության ամենակարևոր չափանիշները, որոնց համաձայն պետք է կառուցվեն նոր ատոմակայանները: «Դա վերաբերում է նաև մեզ: Ներկայումս ուսումնասիրում ենք միջազգային փորձը և աստիճանաբար կսկսենք կիրառել Արևմտյան Եվրոպայում ընդունված անվտանգության չափանիշերը»,-ընդգծեց Ա.Մարտիրոսյանը: