Ձեր վստահելի աղբյուրը

Հայաստանյան ՏՀՏ կազմակերպությունները մեծ հաջողություններով վերադարձել են  նոյեմբերի 10-12 Վրաստանի մայրաքաղաք Թբիլիսիում տեղի ունեցած երրորդ ամենամյա Ինֆորմացիոն Տեխնոլոգիաների Տարածաշրջանային Միջոցառումից (GITI): Ինֆորմացիոն Տեխնոլոգիաների Ձեռնարկությունների Միության կողմից համակարգվող պատվիրակության մեջ ներառված էր 13 հայկական ՏՀՏ ընկերություն: Իրենց ձեռքբերումների մասին պատվիրակության անդամներն այսօր պատմեցին լրագրողների հետ հանդիպման ժամանակ:

Հայկական ՏՀՏ մասնավոր ոլորտը ներկայացնում էին Arminco, iDram, Spyur, Lime Tech, CHS Vericel Service, Universal Systems, Shirakinfo, SPMS, X-Tech, Essential Solutions, Actrade Soft ընկերությունները, իսկ պետական հատվածը` Էլեկտրոնային Կառավարման Ենթակառուցվածքների Ներդրման Գրասենյակը:

Ինֆորմացիոն տեխնոլոգիաների ձեռնարկությունների միության կառավարման խորհրդատու, UITE Expo ՍՊԸ տնօրեն Վահան Հովսեփյանի փոխանցմամբ, հայկական անկյուն են այցելել վիրահայ համայնքի, Վրաստանում Հայաստանի դեսպանության ներկայացուցիչները, առաջարկվել են համագործակցության տարբերակներ:

Միջոցառման ընթացքում տեղի ունեցած մրցանակաբաշխության ժամանակ հայկական պատվիրակությունը 14 անվանակարգերից հաղթեց 5 անվանակարգում:
«Լավագույն մուլտիմեդիա նախագիծ» անվանակարգում հաղթեց X-TECH-ը` ներկայացնելով DIGITEC EXPO 2010 մուլտիմեդիա CD-ն: «Տարվա լավագույն ինտեգրատոր» անվանակարգում հաղթող ճանաչվեց LimeTech ընկերությունը, որը ներկայացրել էր Պետական Եկամուտների Կոմիտեի համար նախատեսված ինֆորմացիոն տաղավարը: «Լավագույն համալիր բիզնես-լուծում» անվանակարգում` iDram ընկերությունը: «Լավագույն ՏՏ-նախագծի առաջարկ» անվանակարգում` EKENG ընկերությունը: «Լավագույն B2B լուծում» անվանակարգում` Essential Solution ընկերությունը:

UITE Expo ՍՊԸ տնօրեն Վահան Հովսեփյանը տեղեկացրեց նաև,  որ մասնավոր հատվածի համար նախատեսված 6 անվանակարգերից 4-ում հաղթելով, հայկական ընկերությունները ցույց տվեցին Հայաստանի ՏՀՏ մասնավոր հատվածի ներուժը, իսկ պետական հատվածը միակ ներկայացուցիչ ԷԿԵՆԳ ընկերության eSignature and Mobile ID լուծումը հավանության արժանացավ միջազգային ժյուրիի կողմից` ստանալով համապատասխան մրցանակ:

Հիշեցնենք, որ հայկական պատվիրակությանը աջակցել են «Դ-լինկ» ընկերությունը, USAID/CAPS և USAID/RCI ծրագրերը` համաֆինանսավորելով մասնակիցների ծախսերը: USAID/CAPS ծրագիրը նաև հատուկ խորհրդատվություն է տրամադրել թիրախային հաճախորդների հետ աշխատելու հարցում: