Ձեր վստահելի աղբյուրը

«Ցավոք, բոլորս չէ, որ գիտենք ու ճանաչում ենք Հայաստանի հանրապետության ու Արցախի հերոսներին: Իսկ «ՀՀ ազգային հերոսներ, Արցախի հերոսներ» գիրքը հնարավորություն կտա անուն առ անուն ճանաչել այդ մարդկանց»,-այսօր լրագրողների հետ հանդիպման ժամանակ ասաց գրքի հեղինակ, պատմաբան, պաշտպանության նախարարության զինվորական թանգարանի տնօրեն Ավագ Հարությունյանը:

Նրա բնորոշմամբ, գիրքն ունի ճանաչողական բնույթ: Այս գիրքը հանրապետությունում ՀՀ ազգային հերոսների ու Արցախի հերոսների ճանաչմանն ուղղված առաջին օրինակն է: «Գրքույկն ունի ռազմահայրենասիրական ու ռազմադաստիարակչական կարևոր նշանակություն: Այդ առումով` նաև արդիական հնչեղություն: Նպատակ կա նաև պատասխանել մեր բանակի հասցեին ադրբեջանցիների կողմից հնչող հոխորտանքներին»,-ասաց նա:

Ասուլիսին ներկա գրքի խմբագիր, պատմաբան Էդգար Հովհաննիսյանն իր հերթին նշեց, որ այս գրքույկում ներկայացված են ՀՀ ազգային հերոսների ու Արցախի հերոսների կենսագրություններն ու լուսանկարները: «Այս գիրքը սպասված էր, քանի որ մեր հասարակության մեջ ներկայում ոչ միայն չեն կարող թվել, թե քանի հերոս ունենք ազգային, այլև` նրանց անունները չեն կարող նշել: Այդ գիրքը միտված է այդ բացը լրացնելու ու հայրենասիրական, քարոզչական նշանակություն ունի»,-ասաց Է. Հովհաննիսյանը:

Այն լույս է տեսել 500 տպաքանակով ու բաժանվելու է բուհերին, որ երիտասարդները կարդան ու ծանոթանան հերոսներին: Այն կթարգմանվի պարսկերեն, իսկ հետագայում նաև նպատակ կա թարգմանել ռուսերեն, թուրքերեն ու անգլերեն: Գրքույկը հրատարակվել է «Հանրապետական» կուսակցության աջակցությամբ ու նվիրվում է կուսակցության 20-ամյակին: Հրատարակիչներն են ՊՆ «Մայր Հայաստան» զիվորական թանգարանն ու հանրապետական կուսակցության երիտասարդական կազմակերպությունը:

Նշենք, որ ՀՀ ազգային հերոս բարձրագույն կոչման արժանաված անձանց հանձնվում է Հայրենիք շքանշան, որը կրում են կրծքի ձախ կողմում: Իսկ Արցախի հերոս կոչմանն արժանացած անձանց հանձնվում է Ոսկե Արծիվ շքանաշան:

Հիշեցնենք, որ
ՀՀ ազգային հերոսներն են.
1. Վազգեն Առաջին
2. Վիկտոր Համբարձումյան
3. Ալեք Մանուկյան
4. Մովսես Գորգիսյան
5. Գեղազնիկ Միքայելյան
6. Մոնթե Մելքոնյան
7. Թաթուլ Կրպեյան
8. Վիտյա Այվազյան
9. Ջիվան Աբրահամյան
10. Յուրա Պողոսյան
11. Կարեն Դեմիրճյան
12. Վազգեն Սարգսյան
13. Քըրք Քրքորյան
14. Շառլ Ազնավուր
15. Նիկոլայ Ռիժկով

Արցախի Հերոսներն են.
1. Սամվել Բաբայան
2. Վազգեն Սարգսյան
3. Աշոտ Ղուլյան
4. Մոնթե Մելքոնյան
5. Սեյրան Օհանյան
6. Ռոբերտ Քոչարյան
7. Քրիստափոր Իվանյան
8. Մանվել Գրիգորյան
9. Սամվել Կարապետյան
10. Սերժ Սարգսյան
11. Պետրոս Ղևոնդյան
12. Յուրա Պողոսյան
13. Մովսես Հակոբյան
14. Վիտալի Բալասանյան
15. Գեորգի Գասպարյան
16. Վահագն Վարդևանյան
17. Զորի Բալայան
18. Արշավիր Ղարամյան
19. Արկադի Ղուկասյան
20. Արկադի Տեր-Թադևոսյան