Ձեր վստահելի աղբյուրը

Ամուսնու և սկեսրոջ կողմից դաժան ծեծի հետևանքով մահացած 20-ամյա Զարուհի Պետրոսյանի 1.5 տարեկան դուստրն այժմ հորական տատու խնամքի տակ է: Զարուհու քույրն ու նրա բարեկամները, սակայն, դեմ են, որ երեխան «մարդասպանի մոտ մնա»: Այս մասին այսօր Զ. Պետրոսյանի գործի արդար քննության համար կազմակերպված երթի ժամանակ լրագրողների հետ զրույցում ասաց Զ. Պետրոսյանի քրոջ սկեսուրը` Անահիտ Կարապետյանը:

«Զարիկին մեր տանն էինք պահում ծեծած-ջարդած: Էլի ամուսինը եկավ ու ծեծելով տարավ, չէր գնում Զարիկը: Ճաշ էինք տալիս երեխային, վախենալով ասում էր. «Շատ մի տուր, սկեսուրս կջղայնանա, կասի տարար երեխի ստամոքսը լենցրիր բերիր»: Ինչի տատիկն էդպե՞ս է լինում: Ես ախ եմ անում, որ իմ թոռնիկները մի աման ճաշ ուտեն, դրա համար ամբողջ օրն ամանը ձեռքս պտտվում եմ»,-ասաց նա:

Ա. Կարապետյանը հուզմունքով նշեց, եթե օրենք կա, ուրեմն պետք է երեխային վերցնեն նրանց ձեռքից իսկ Զ. Պետրոսյանի սկեսուրն էլ պետք է պատժվի: Նա նշեց, որ երեխային ուզում են իրենք վերցնել տատու մոտից: Դրա համար դիմել են Մասիսի քաղաքապետարան, իրավաբանական գրասենյակ:

«Մեզ պատասխանեցին, թե վարձով ենք ապրում ու հնարավոր չէ: Ինչի մարդասպանին երեխա տալ հնարավոր է, մեզ չէ՞: Վարձով եմ ապրում, բայց 6 երեխա եմ պահել, մինչև հիմա էլ, փառք Աստծու, թոռներիս եմ պահում: Ճիշտ է` վարձով ենք ապրում, բայց Հայաստանի կեսը վարձով են ապրում… Սկեսուրն էլ իբր լավն է, լավ կպահի… ծեծով-ջարդով կպահի էլի»,-վրդովված ասաց նա:

Նշենք, որ երթին մասնակցում էր նաև «Ժառանգություն» կուսակցության հիմնադիր ղեկավար Րաֆֆի Հովհաննիսյանը: Նա Panorama.am-ին ասաց, որ այս «հանցագործ-ողբերգությունը» պատկանում է յուրաքանչյուր քաղաքացու: Նրա խոսքով, բռնությունը` լինի սեռական, հոգեբանական, տեղ չպետք է ունենա հայ հասարակության մեջ:

«Դա հակատղամարդկային է: Ժամանակն է, որ զորավիգ լինենք մեկս մյուսի իրավունքների պաշտպանությանը: Պետք է ոչ միայն խստացվի օրենքը, այլ այդ խստացված օրենքը լիարժեք կիրառվի բոլոր հանցագործների նկատմամբ և հասարակությունը պետք է գա այն գիտակցության, որ բռնությունը տեղ չունի հասարակության մեջ: Մեր սերունդը պետք է այն արմատախիլ անի»,-ասաց նա:

Քաղաքական գործիչը նշեց, որ Զարուհի Պետրոսյանի հանդեպ կատարվածի առիթով բարձրացրած բողոքի ձայնը թող լինի բռնության դեմ հասարակական պայքարի դրսևորումներից մեկը: 
 Ր. Հովհաննիսյանը հավելեց նաև, որ Զարուհուն սպանած հանցագործներն անպատիժ չպետք է մնան: