Ձեր վստահելի աղբյուրը

Այն բանից հետո, երբ հայտնի դարձավ, որ աշխարհի ֆուտբոլի 2018 թ. առաջնությունը կայանալու է Ռուսաստանում, ՌԴ վարչապետ Վլադիմիր Պուտինը մեկնեց Ցյուրիխ և լրագրողների հետ հանդիպման ժամանակ հայտարարեց, որ համաշխարհային ֆուտբոլային գլխավոր իրադարձության կազմակերպման համար Ռուսաստանը ներդնելու է 10 մլրդ դոլար: Նա նաև Ռոման Աբրամովիչին առաջարկեց մասնակցել ենթակառուցվածքների ստեղծման աշխատանքներին: Իսկ իր երկրի ազգային հավաքականից ՌԴ վարչապետը միայն հաղթանակ է ակնկալում…

Իր ելույթն սկսելով ՖԻՖԱ-ի գործկոմին հղած շնորհակալական խոսքերով` Վլադիմիր Պուտինը հայտարարեց, որ ֆուտբոլն օգնում է` փոխելու աշխարհը դեպի լավը:
«Ֆուտբոլն աշխարհում դրական փոփոխություններ է մտցնում: Մեզ համար մեծ պատիվ է, որ հաղթել ենք ծանր և համառ պայքարում: Խոստանում ենք առաջնությունը կազմակերպել բարձր մակարդակով, խոստանում ենք ապահովել մարդկանց անվտանգությունը «ԱԱ-2018»-ի ընթացքում: Շնորհակալություն համագործակցության համար,- ասել է Պուտինը:- Մենք արդեն մի շարք առաջարկներ ունենք` կապված երկիր ազատ մուտքի և քաղաքից քաղաք ազատ տեղափոխության հետ: Դուք, իհարկե, տեղյակ եք այդ մասին: Բայցի այդ, կծանոթանաք Ռուսաստանին, որը մեծ պատմություն ունեցող յուրահատուկ երկիր է»:

Ռուսաստանի կառավարության ղեկավարը կրկին հիշել է այն սկանդալի մասին, որն ընտրությունների նախօրեին եթեր էր հեռարձակել BBC հեռուստաընկերությունը:
«Այն, ինչ արեց BBC-ն, ինձ համար անընդունելի է: Դա անբարեխիղճ մրցակցության նշան էր,- նշել է Պուտինը:- Մենք ճիշտ մարտավարություն ընտրեցինք, որը համապատասխանում է ՖԻՖԱ-ի փիլիսոփայությանը` շեշտը դնելով համաշխարհային ֆուտբոլի սահմանների ընդլայնման վրա: Մենք կրում ենք համաշխարհային տնտեսական ճգնաժամի ծանր հետևանքները, եվրոպական երկրները բախվել են ֆինանսական լուրջ խնդիրների հետ, Ռուսաստանում նույնպես բարդություններ առաջացան: Սակայն ոսկու մեր պաշարն աշխարհում երրորդն է, իսկ տարվա արդյունքներով ակնկալում ենք աճ 4 տոկոսով»:

Վլադիմիր Պուտինը հայտարարել է նաև, որ աշխարհի 2018 թ. առաջնությունը կխթանի ֆուտբոլի զարգացման գործընթացը Ռուսաստանում:
«Այո, ՌԴ հավաքականը չմասնակցեց աշխարհի վերջին առաջնությանը… Իսկ որտե՞ղ էր հայտնվել Հարավաֆրիկյան Հանրապետության ընտրանին: Աշխարհի առաջնության անցկացման իմաստն այն է, որ աճի մարզաձևի մասսայականությունը, որպեսզի ավելի շատ մարդիկ դառնան նրա մի մասը: Մենք հույս ունենք, որ արդեն միայն առաջնության կազմակերպման փաստը կխթանի ֆուտբոլի զարգացումը մեր երկրում: Ողջ երկրում նվազագույնը 500 ֆուտբոլային խաղահրապարակ կստեղծենք: Սա մարտահրավեր է, որը մենք ընդունում ենք: Նախնական հաշվարկներով` մարզադաշտերի կառուցման և ենթակառուցվածքների ստեղծման աշխատանքների համար կպահանջվի մոտ 10 մլրդ դոլար: Նույնքան գումար է ծախսվել նաև Հարավաֆրիկյան Հանրապետությունում: Ինչո՞ւ Ռուսաստանի մյուս շրջաններում աշխարհի առաջնության հանդիպումներ չեն կազմակերպվելու… Մենք, իհարկե, չենք կարող ամեն ինչ միանգամից զարգացնել: Եթե խոսենք Եկատերինբուրգի մասին, ապա պետք է շեշտենք, որ դա երկրի կենտրոնն է: Բայց պետք է հաշվի առնենք ՖԻՖԱ-ի պահանջները: Խոսքը 10-13 քաղաքի մասին է, որոնք հնարավորինս մոտ պետք է լինեն իրար: Մոսկվայում «Սպարտակ» մարզադաշտը կկառուցենք «Լուկօյլ»-ի հաշվին, «Դինամոն»` ՎՏԲ-ի: Կազանում ենթակառուցվածքները կստեղծվեն` կապված Ունիվերսիադայի հետ: Սոչիում կայանալու են Օլիմպիական խաղերը, իսկ Սանկտ Պետերբուրգի մարզադաշտը կկառուցի «Գազպրոմը»:

ՌԴ վարչապետի խոսքերով` երկրին կարող է օգնել նաև Ռոման Աբրամովիչը:
«Պարոն Ռոման Աբրամովիչը մի քանի տարի շատ լավ է աշխատել Չուկոտկայում: Այդ մասին բոլորը չէ, որ գիտեն: Բոլորն ասում են, որ նա օլիգարխ է… Բայց Ռոման Աբրամովիչն օգնում է Ռուսաստանում ֆուտբոլի զարգացմանը: Օգնում է` զարգացնելու ընդամենը մեկ ակումբ: Թե որ ակումբն է, չի ասում, քանզի դա արգելված թեմա է: Բացառված չէ, որ պարոն Աբրամովիչն օգնի մեզ` նախապատրաստվելու աշխարհի առաջնությանը: Թող շարժվի տեղից, դրանով հաստատ չի աղքատանա: Նա շատ փող ունի»,- ընդգծել է Վլադիմիր Պուտինը: