Ձեր վստահելի աղբյուրը

«Ես երկար տարիներ ցանկանում էի գալ Հայաստան: Իմ և իմ ողջ խմբի համար մեծ պատիվ է ելույթ ունենալ այնպիսի մի երկրում, ինչպիսին Հայաստանն է»,-աշխարհահռչակ երգիչ, տենոր Պլասիդո Դոմինգոն ասել է հայ լրագրողների հետ հանդիպման ժամանակ:

Հստակորեն կարելի է արել, որ դասական երաժշտության սիրահար հայ հասարակության համար էլ կրկնակի մեծ պատիվ էր, որ հնարավորություն ունեցավ հայկական բեմում լսել ու ըմբոշխնել աշխարհահռչակ երգչի անկրկնելի ձայնը:

Երեկ Կարեն Դեմիրճյանի անվան մարզեհամարգային համալիրը լեփ-լեցուն էր. «Երևանյան հեռանկարներ» 11-րդ երաժշտական միջազգային փառատոնի շրջանակներում ու ՀՀ նախագահ Սերժ Սարգսյանի բարձր հովանու ներքո բացառիկ համերգով հանդես էր գալիս Պլասիդո Դոմինգոն: Նրա հետ ելույթ ունեցան աշխարհի լավագույն սոպրանոներից Աննա Մարիա Մարտինեզը, հայ բարիտոն Բարսեղ Թումանյանը, Ռոզի Անուշ Սվազլյանը, դիրիժորներ` Իսրայել Գուրսկին ու Էդուարդ Թոփչյանը, Հայաստանի պետական ֆիլհարմոնիկ նվագախումբը:
Ի դեպ, նշենք, որ համերգի տոմսի արժեքն էր 20-150 հազար դրամ: Մարդիկ տեղավորվել էին նաև շարքերի միջանցքներում, նստել աստիճաններին, իսկ նրանք, ովքեր չէին կարողացել տոմսեր ձեռք բերել, հավաքվել էին համալիրի մուտքի մոտ:

Հիշեցնենք, որ Պ. Դոմինգոյի համերգին ներկա էին նաև ՀՀ նախագահը տիկնոջ հետ, Ամենայն Հայոց Կաթողիկոս Գարեգին Երկրորդը, Ազգային ժողովի նախագահ Հովիկ Աբրահամյանը, վարչապետ Տիգրան Սարգսյանն իրենց տիկնանց հետ:

Համերգի ընթացքում հնչեցին հատվածներ Ժորժ Բիզեի «Կարմեն», Շառլ Գունոյի և Ռիխարդ Վագների «Ֆաուստ», Ալֆրեդո Կատալանիի «Լա Վալլի», Ջուզեպպե Վերդիի «Սիմոն Բոկանեգրա», «Նաբուկո», Ֆրանց Լեհարի «Ժպիտների աշխարհը» և այլ հայտնի ստեղծագործողների աշխատանքներից:

Յուրաքանչյուր կատարումից հետո հնչող երկարատև ծափահարությունները վկայում էին մի բանի մասին` հիացած էին բոլորը: Հանդիսականները, դուրս գալով համերգասրահից, գրեթե նույն բան էին ասում` «անկրկնելի էր»:

Պլասիդոն ծնվել է 1941 թվականին, Մադրիդում: 1962 թվականից մուտք է գործել օպերային արվեստ, հետագայում, արտաքին գրավչության և ձայնային բացառիկ տվյալների շնորհիվ, գրավել է համաշխարհային մեծ բեմերը։ Առ այսօր նա կատարել է 128 օպերային դեր իտալերեն, ֆրանսերեն, գերմաներեն, անգլերեն, իսպաներեն և ռուսերեն։ Արժանացել է տարբեր պարգևների` Ֆրանսիայի Պատվո Լեգեոն շքանշանի ասպետ, Իտալիայի Հանրապետության շքանշան, Համբուրգի, Մյունխենի և Վիեննայի «Կամերային երգիչ» կոչում, Մադրիդի, Օկլահոմայի համալսարանների պատվավոր դոկտոր, Լոս Անջելեսի և Վաշինգտոնի օպերային թատրոնների գեղարվեստական տնօրեն: Նրա աստղը զարդարում է Հոլիվուդի Փառքի ծառուղին: