Ձեր վստահելի աղբյուրը

Վ.Դալլաքյան. «Առաջիկայում նախագահ Սերժ Սարգսյանը ներքքաղաքական հարցերում ավելի արմատական քայլերի կգնա»

«Հայաստանի համար ամենալրջագույն երկու խնդիրները, որ իրենց ազդեցությունն ունեցան նաև 2010թ-ին, արտագաղթն ու աղքատությունն են:

Պաշտոնական տվյալները ցույց են տալիս, որ Հայաստանում այսօր 1.1 մլն աղքատ կա, այսինքն` բնակչության ավելի քան 34 տոկոսն աղքատ է: Հասկանալի է, որ սա երկրի համար չափազանց վտանգավոր երևույթ է»,- Panorama.am-ի հետ զրույցում` ամփոփելով անցնող տարին, նշեց ԱԺ պատգամաբվոր Վիկտոր Դալլաքյանը:

Արտագաղթի խնդրի մասին ասաց. «1991թ-ից մինչ օրս , դարձյալ պաշտոնական թվերի համաձայն, Հայաստանից արտագաղթել է 1.5 մարդ … մեկնաբանություններն ուղղակի ավելորդ են»:

Ըստ պատգամավորի, այս երկու կարևոր բնագավառներում, ցավոք, իշխանություննեն անցնող տարում հաջողությունների չեն հասել, ավելին` մեկ տարվա ընթացքում աղքատների թիվը Հայաստանում ավելացել է 214 հազարով:

Բացի նրանից, որ սրանք խոսուն փաստեր են, նրա խոսքերով, դրանք նաև չափազանց վտանգավոր են ու կարդինալ լուծումների կարիք ունեն:

Ընդհանուր առմամբ պատգամավորի ներկայացրած ամփոփումը դեպրեսիոն տրամադրվածության սկզբաղբյուր կարող է հանդիսանալ, այն էլ` նախատոնական այս օրերին, սակայն պարզվեց, որ Վ.Դալլաքյանը անցնող տարին ամփոփում է ոչ միայն նման տխուր փաստերի արձանագրմամբ, այլ նաև ձեռքբերումները մատնանշելով:

Այս իմաստով Հայաստանի համար ձեռքբերումները տեղավորվում են արտաքին քաղաքականության հարթակում.
«Նախագահ Սարգսյանին հաջողվեց արտաքին մարտահրավերները` մասնավորապես Լեռնային Ղարաբաղի հիմնահարցում, չեզոքացնել, իսկ այն պաուզան, որ նախագահը վերցրել է արտաքին քաղաքականության առումով, ըստ իս, ուղղված են ներքաղաքական բնագավառում լրջագույն, այդ թվում` համակարգային և կադրային փոփոխություններ իրագործելու ցանկությամբ»,- հայտարարեց Վ.Դալլաքյանն ու ավելացրեց, որ նա այդ հնարավորությունը տեսնում է և ավելի քան համոզված է, որ ներքին քաղաքական հարցերում նախագահն առաջիկայում ավելի արմատական քայլերի կգնա: