Ձեր վստահելի աղբյուրը

Վերջին շրջանում Հայաստանի բարձրագույն կրթության ոլորտում իրականացվել են նկատելի բարեփոխումներ, սակայն ոլորտը դեռևս չունի տնտեսության մրցունակության բարձրացման ընդհանուր պլատֆորմին ինտեգրված զարգացման հստակ ռազմավարություն: Ինչպես նշված է «Տնտեսություն և արժեքներ» հետազոտական կենտրոնի կողմից ներկայացված Հայաստանի ազգային մրցունակության երրորդ զեկույցում` նվիրված բարձրագույն կրթության մարտահրավերներին, առավել մտահոգիչ է այն, որ ոլորտի հիմնական շահագրգիռ կողմերի շրջանում դեռևս չկա անվերապահ համաձայնություն համաշխարհային մակարդակով մրցունակ բարձրագույն կրթության համակարգ ստեղծելու անհրաժեշտության վերաբերյալ: Այնուհանդերձ, նրանց ավելի ու ավելի մեծ մասն է սկսում զգալ այս ուղղությամբ գործողությունների իրականացման անհրաժեշտությունը:
Հաշվի առնելով մրցունակության և կրթության փոխկապակցվածությունը` Ազգային մրցունակության զեկույցը շեշտադրում է, որ Հայաստանի նոր տնտեսական մոդելը պետք է հիմնվի մարդկային կապիտալի զարգացման վրա, որն էլ իր հերթին հիմնվում է դինամիկ կրթական համակարգի վրա:

Ըստ զեկույցի, Հայաստանի նոր տնտեսական մոդելը իրատեսական է հիմնել երեք մրցակցային առավելությունների վրա, որոնք բոլորը միասին կարող են Հայաստանի համար ապահովել եզակի դիրքավորում աշխարհում: Այս առավելությունները, այն է` գիտելիքի, ցանցային և արժեքային/էթիկական առավելությունները, ձևավորվելու են մարդկային կապիտալի զարգացման արդյունքում և որոնք իրենց հերթին նպաստում են այդ կապիտալի զարգացմանը:

Նոր տնտեսական մոդելի վերոհիշյալ տեսլականը նաև հիմնավորում է Հայաստանի բարձրագույն կրթության համակարգը բարելավելու հրատապությունը` այն համաշխարհային մակարդակով մրցունակ դարձնելու համար: Դա առնվազն չորս կարևորագույն դրդապատճառ ունի` տաղանդի և գիտելիքների վրա հիմնված ինքնուրույն տնտեսություն կառուցելու ունակություն, տաղանդի վրա հիմնված տնտեսության առկայությունը Հայաստանում, տաղանդներ գրավելու և պահելու ունակություն, միջազգային շուկայում բարձրագույն կրթական ծառայություններ տրամադրելու ունակություն: