Ձեր վստահելի աղբյուրը

«ԱՌԿԱ» տեղեկատվական գործակալության վարկածով՝ Mediagid լրատվական ագրեգատորն ընդգրկվել է տեղեկատվական տեխնոլոգիաների ոլորտում արձանագրված տարվա կարևոր իրադարձությունների տասնյակում:

Հիշեցնենք, որ MediaGid-ը լուրերի ավտոմատ մշակման և համակարգման համակարգ է։ MediaGid ստացվող տվյալները վերլուծության են ենթարկվում հատուկ ծրագրի կողմից, որը բովանդակությամբ մոտ նյութերը միավորում է սյուժեների մեջ, որոնք կատեգորիաների են բաժանված։

Այս տարի www.mediagid.am-ի գործարկումն «ԱՌԿԱ» գործակալության կողմից նշվեց որպես ՏՏ ոլորտի կարևորագույն իրադարձություններից մեկն այնպիսի իրադարձություններին զուգընթաց, ինչպիսիք են LТЕ ցանցի շահագործման հանձնումը, IPhone 4-ը վաճառքի հանելը։

«Mediagid.am կայքի ընդգրկումը տարվա ՏՏ կարևորագույն իրադարձությունների ցուցակում վկայում է հայկական ինտերնետ-շուկայի զարգացման և հայ էլեկտրոնային հասարակության համար լրատվական ագրեգատորի գործարկման նշանակությունը, ինչը մեզ խրախուսում է ռեսուրսի հետագա զարգացման գործում, հայ հասարակության շրջանում դրա դերի բարձրացման, ինչպես նաև կիրառվող գործիքների արդիականացման և կատարելագործման գործում»,- ասաց MediaGid.am նախագծի ղեկավար Արմեն Մարտիրոսյանը։

Նշենք, որ www.mediagid.am ագրեգատորի կայքում այժմ օրական ստացվում է ավելի քան 1200 միավոր տեղեկատվություն երեք լեզվով՝ հայերեն, ռուսերեն և անգլերեն։ Տեղեկատվությունը թարմացվում է շուրջօրյա՝ իրական ժամանակի ռեժիմում։
Ագրեգատորի գործարկման պահից ավելի քան 20 հայկական տեղեկատվական ռեսուրսներ իրենց հայտերն են ներկայացրել համակարգին մասնակցելու համար։ Այժմ կայքում տեղեկատվություն է խմբավորվում տեղեկատվական 11 տարբեր ինտերնետ-ռեսուրսներից: