ՀԲ-ն աջակցում է Հայաստանին` աղքատներին օժանդակելու և երկիրն առավել մրցունակ դարձնելու նպատակով
Համաշխարհային բանկի գործադիր տնօրենների խորհուրդն այսօր հաստատել է Հայաստանին աջակցելու ֆինանսական փաթեթ` ուղղված սոցիալապես անապահով խավերի աջակցությանը, մարդկային կապիտալի զարգացմանը խթանելուն, ինչպես նաև երկրի մրցունակության հզորացմանն ու մասնավոր հատվածի զարգացմանը: Հայաստանին տրամադրված 25 միլիոն ԱՄՆ դոլար վարկի չափով երկրորդ Զարգացման քաղաքականության գործառնությունը (ԶՔԳ) երկրորդն է նախատեսված երեք գործառնություններից, որոնք կոչված են սատարելու Հայաստանի կառավարությանն` իր ռազմավարական նպատակներին հասնելու համար:
Այս մասին հայտնում են Համաշխարհային բանկի Երևանի գրասենյակից:
Այս գործառնությունն աջակցում է սոցիալապես անապահովներին ուղղված պետական բյուջեի ծախսերին, սոցիալական ապահովության ցանցի հզորացման ծրագրերին, աղքատ համայնքներում նախադպրոցական ծրագրերի մատչելիությունը բարձրացնելուն և ոչ վարակիչ հիվանդությունների բուժման ընթացքում առողջապահական ծառայությունների մատուցման արդյունավետությունը բարելավելուն:
Հայաստանի մրցունակությունը բարձրացնելու և աճի ներուժը մեծացնելու նպատակով` սույն գործառնությունն օժանդակում է մրցակցային դաշտի ամրապնդմանն և Ընդերքի մասին նոր օրենսգրքի կիրարկմանը` ֆիսկալ, բնապահպանական, սոցիալական և արտոնագրման ոլորտներում միջազգային լավագույն փորձի համաձայն: Այն նաև սատարում է առանցքային բարեփոխումների ծրագրին` ուղղված գործարար մթնոլորտի բարելավմանն ու հարկային վարչարարության բարեփոխմանը:
«Այս գործառնությունն օժանդակում է Հայաստանի կառավարության բարեփոխումների ընդհանուր ծրագրի առանցքային տարրերին, որոնք կարևոր նշանակություն ունեն տնտեսության վերականգնման կայունացման և աղքատ ու խոցելի խավերի պաշտպանության համար: Տնտեսության վերականգնման ընթացքը պահպանելու և աշխատատեղեր ստեղծելու նպատակով անհրաժեշտ են կայուն բարեփոխումներ հարկային, մաքսային և տնտեսական մրցակցության ոլորտներում, որոնք պետք է ուղեկցվեն հանքարդյունաբերության ոլորտում ժամանակակից համակարգերի ներդրմամբ` խարսխված սոցիալական և բնապահպանական պատասխանատվության վրա»,- նշել է Համաշխարհային բանկի Հարավային Կովկասի երկրների տարածաշրջանային տնօրեն Ասադ Ալամը:
«Առաջարկվող ծրագիրը սատարում է բարեփոխումների` ըստ առաջնահերթությունների կազմված փաթեթին, որն անհրաժեշտ է Հայաստանի տնտեսությունը դիվերսիֆիկացնելու, այն առավել մրցունակ դարձնելու, շահերի բախումը կարգավորող կանոնակարգի ներդրման միջոցով հանրային հատվածի արդիականացումը շարունակելու և միջնաժամկետում երկրի զարգացումն ապահովելու համար: Սա հատկապես կարևոր է, քանի որ աճի բարձր տեմպերի վերականգնումով է պայմանավորված Հայաստանի բնակչության կյանքի պայմանների արագ բարելավումը»,- ասել է Համաշխարհային բանկի` ծրագիրը մշակած խմբի ղեկավար Պեդրո Լ. Ռոդրիգեսը:
«Համաշխարհային բանկը վճռական է տրամադրված երկարաժամկետ հատվածում այս բոլոր կարևոր օրակարգային ծրագրերի իրականացման ընթացքում Հայաստանի իշխանությունների ջանքերին աջակցելու հարցում, և այս առումով ակնկալվում է, որ մշակման փուլում գտնվող երրորդ ԶՔԳ-ն կպահպանի հետճգնաժամային մրցունակության և աճի խթանման ուղղվածությունը, ինչպես նաև առողջապահական, կրթական ու սոցիալական ապահովության ցանցի ամրապնդումը»,- նշել է Հայաստանում Համաշխարհային բանկի գրասենյակի տնօրեն Ժան-Միշել Հապին:
Երկրորդ ԶՔԳ-ն ներառում է ՄԶԸ 21 միլիոն ԱՄՆ դոլար վարկ և ՎԶՄԲ 4 միլիոն ԱՄՆ դոլար վարկ: ՄԶԸ վարկն ունի 20 տարվա մարման ժամկետ` 10 տարի արտոնյալ ժամկետով, իսկ ՎԶՄԲ փոխառությունը` 25 տարվա մարման ժամկետ` 10 տարի արտոնյալ ժամկետով:
1992 թ. Համաշխարհային բանկին և 1993 թ. ՄԶԸ-ին Հայաստանի անդամակցությունից հետո, նրա նկատմամբ հանձնառությունները կազմում են մոտ 1 միլիարդ 433 միլիոն դոլար
Լրահոս
Տեսանյութեր
Կլինի այնպիսի մի շաբաթ, երբ որ այդ լուրը գուցեև ճիշտ լինի. Ավանեսյանը՝ ՔՊ-ի թիրախում լինելու մասին
