Մ. Սաակաշվիլի. «Մի գնացեք ուրիշ երկիր, մնացեք ձեր երկրում, զարգացրեք ձեր երկիրը»

Կրթություն, գիտություն 19:02 22/01/2011

«Այստեղ ուղղակի օդում է ինչ-որ հատուկ տաղանդը`բարձր տեխնոլոգիաների համար: Հենց այստեղ է Հայաստանի յուրահատկությունը և հայ ժողովրդի տաղանդը»,- «Սինոփսիս Արմենիա» ընկերությունում, որտեղ տեղի ունեցավ մաթեմատիկայի, ֆիզիկայի և ինֆորմատիկայի հայ-վրացական օլիմպիադայի փակման արարողությունը, ասաց Վրաստանի նախագահ Միխեիլ Սաակաշվիլին:

«Մի գնացեք ուրիշ երկիր, մնացեք ձեր երկրում, զարգացրեք ձեր երկիրը, ձեռք ձեռքի բռնենք և միասին մտածենք տարածաշրջանի զարգացման մասին»,-հորդորեց Միխեիլ Սաակաշվիլին:

Վրաստանի նախագահը նաև տեղեկացրեց, որ հայ երիտասարդների համար նախատեսել է ստեղծել Վրաստանի նախագահի դրամաշնորհ: Այն ունենալու է 10 հաղթող և այդ հայ երիտասարդներին հնարավորություն է տրվելու ուսումը շարունակել Վրաստանի բուհերում:

«Մենք հազարամյակներ ապրելով կողք կողքի երբեք իրար դեմ զենք չենք հանել, մենք մրցել ենք գրականությամբ, վիճել ենք, թե ում թատրոնն է ավելի հին, ով է ավելի լավ ֆուտբոլ խաղում, լավ շախմատ։ Սա է եղել մեր մրցակցության հիմքը։ Եվ սա շատ լավ պատգամ է, որպեսզի կարողանանք փոխանցել մեր զավակներին»,- նշեց ՀՀ նախագահ Սերժ Սարգսյանը:

Նշենք, որ մաթեմատիկա, ֆիզիկա և ինֆորմատիկա առարկաներից յուրաքանչյուր երկրից օլիմպիադայի մասնակցել է 30-ական աշակերտ: Երկու պետությունների աշակերտների միջև երկրորդ առարկայական օլիմպիադան նախատեսվում է անցկացնել Վրաստանում:

Հիշեցնենք, որ «Սինոփսիս Արմենիա» ընկերությունում Հայաստանի ևՎրաստանի նախագահները հայ-վրացական աշակերտական օլիմպիադայի հաղթողներին հանձնեցին պատվոգրեր և հուշանվերներ, իսկ յուրաքանչյուր առարկայից լավագույն մասնակիցները նախագահներից ստացան համակարգիչներ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: