Ձեր վստահելի աղբյուրը

«Ազատության նավատորմի» վրա հարձակման հետաքննությունն ուսումնասիրող իսրայելական հանձնաժողովը հանդես է եկել զեկույցով, որում արդարացրել է իսրայելական ուժային կառույցների գործողությունները:
Այս մասին հաղորդում է «The Jerusalem Post» պարբերականը:

Զեկույցում ընդգծվում է, որ նավատորմի գրավման գործողություններն անցկացվել են միջազգային իրավունքի նորմերին համապատասխան, սակայն միևնույն ժամանակ նշվում է, թե դրանք բերել են «ցավալի հետևանքների», նշելով Թուրքիայի ինը քաղաքացիների զոհվելու փաստը:
Զեկույցում մարդկային զոհերի համար պատասխանատվությունը բարդվում է բացառապես նավատորմի անձնակազմի վրա:

Հետաքննչական հանձնաժողովը ստեղծվել էր 2010 թ-ի հունիսին: Կազմում ընդգրկվել էին 4 իսրայելցի ու երկու այլազգի միջազգային փորձագետ: Պարբերականի հաղորդմամբ, զեկույցի եզրահանգումները միաձայն ընդունվել են հանձնաժողովի բոլոր անդամների կողմից:

Հիշեցնենք, «Ազատության նավատորմի» վրա իրականացված գործողությունները տեղի էին ունեցել 2010 թ-ի մայիսին: Գազայի հատված հումանիտար օգնություն տեղափոխող նավատորմին իսրայելական կողմը համապատասխան զգուշացում էր ուղարկել փոխել երթուղին ու պաղեստինցիների համար նախատեսված օգնությունը հասցնել իսրայելական կողմի համապատասխան թույլտվությունից հետո:
Միջազգային ՀԿ  ներկայացուցիչների ու ակտիվիստների կողմից մերժում ստանալուց հետո իսրայելցի հատուկ ծառայության ջոկատները ներխուժում ու առգրավում են հումանտար օգնությունը: Նավատորմի անձնակազմի հետ բախումների ժամանակ զոհվում է 16 մարդ, այդ թվում Թուրքիայի քաղաքացիներ, ինչը պատճառ է դառնում երկու երկրների միջև հարաբերությունների երկարատև սրմանը:
Ավելի վաղ, «Ազատության նավատորմի» վրա իրականացված հարձակման հետաքննությամբ զբաղվել էր նաև ՄԱԿ-ի հատուկ հանձնաժողովը, որն եզրահանգել էր, թե իսրայելական ուժային կառույցները անհամաչափ ուժ էին կիրառել ակտիվիստների նկատմամբ, խախտելով միջազգային իրավունքի նորմերը: