Բուհում ստացած գիտելիքներն ու գործատուի պահանջները չեն համապատասխանո՞ւմ իրար

Հասարակություն 13:50 26/01/2011

Բուհում ստացած գիտելիքներն ու գործատուի պահանջները չեն համապատասխանո՞ւմ իրար

ՀՀ աշխատանքի և սոցիալական հարցերի նախարարությանը կից գործող Երիտասարդների մասնագիտական կողմնորոշման կենտրոնի տվյալների համաձայն, Հայաստանում շուրջ 22.000 երիտասարդ այսօր զբաղվածության խնդիր ունի: Երիտասարդները զբաղվածության խնդիր ունեն ինչպես Երևանում, այնպես էլ մարզերում, մասնագիտությունները տարբեր են:
Այս մասին Panorama.am-ի թղթակից հետ զրույցում ասաց Եվրոպական Ուսանողների Ֆորումի համակարգող Գայանե Գրիգորյանը:

Նշենք, որ Եվրոպական Ուսանողների Ֆորումը (AEGEE-Yerevan) հունվարի 28-ին կազմակերպում է մեկօրյա դասընթաց` նվիրված երիտասարդների գործազրկությանը և նրանց զբաղվածության հիմնախնդրին:

Գ. Գրիգորյանը տեղեկացրեց, որ դասընթացի ընթացքում մասնակիցները կծանոթանան հաջողակ ինքնակենսագրական և ուղեկցող նամակ գրելու հմտություններին, կսովորեն, թե ինչպես նախապատրաստվել գործատուի հետ հարցազրույցին, ինչպես նաև կտեղեկացվեն տարբեր աշխատանքային, կրթական և կամավորական հնարավորությունների մասին:

«Խնդիրը ոչ միայն գործազրկությունն է, այլ այսօր նույնիսկ խնդիր է առաջանում աշխատանքի անցնելու ժամանակ: Թեև, օրինակ, աշխատանքի դիմողն ունի այն մասնագիտությունը, ինչ պահանջում է գործատուն, սակայն բուհում ստացած գիտելիքները չեն համապատասխանում գործատուի պահանջներին: Այս և այլ խնդիրներ կքննարկվեն հենց այդ մեկօրյա դասընթացի ժամանակ»,- ասաց նա:

Դասընթացին մասնակցելու են ներկայացուցիչներ Երիտասարդների մասնագիտական կողմնորոշման կենտրոնից, Գերմանական ակադեմիական փոխանակման ծառայությունից (DAAD), Միջազգային հետազոտությունների և փոխանակման խորհրդից (IREX), Erasmus Mundus փոխանակման ծրագրից և այլ կազմակերպություններից:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: