Էրդողանը հարցնում է. «Իսկ Դինքի սպանությունը ո՞վ էր պատվիրել»

Քաղաքական 11:48 26/01/2011

«Էրմենիհաբեր»(Ermenihaber.am) լրատվական կայքի տեղեկացմամբ, պաշտոնական այցով Ուկրաինա մեկնած Թուրքիայի վարչապետ Ռեջեփ Թայիփ Էրդողանին թուրքական «Birgun» (Բիրգյուն) պարբերականի թղթակից Ադեմ Յավուզ Արլսանը ինքնաթիռում հանձնել է իր հեղինակած «Մի հայ կա, Հրանտ Դինքի սպանության գաղտնազերծումը» գիրքը:

Ստանալուն պես Էրդողանը հետաքրքրվել է սպանության մանրամասներով և նրանց միջև ծավալվել է հետևյալ զրույցը:

Էրդողան
- Որպես հանցագործության վայր, ո՞րն ես գրել, Տրապիզոնը թե՞ Շիշլին:

Արսլան
-Բոլոր մանրամասները աշխատել եմ հաշվի առնել. Անկարա, Ստամբուլ և Տրապիզոն: Ավելի շատ փորձել եմ ներկայացնել սպանությանը նախորդող շրջանը և այն, թե Թուրքիան ինչպես է պատրաստվել սպանությանը:

Էրդողան
- Մարդասպանը հայտնի է, բայց դեռ ճշգրտված չէ ղեկավար կենրոնը: Այնտեղ ո՞վ կա:

Արսլան
- Բացահայտումներն ու ապացույցները մի տեղ են տանում: Ինչպես հայտնի է, նման սպանությունները որոշակի հոգեբանական մթնոլորտում են կատարվում: Ասում են` այս տեսակ սպանությունները կրոնական ազդեցությամբ են լինում…Այս հարցում քննդատություններ կան այն առումով, որ կառավարությունը անհրաժեշտ միջոցներ չի ձեռնարկել:

Էրդողան
- Մենք 36 ժամվա ընթացքում մարդասպանին և նրա հետ առնչվածներին ձերբակալեցինք: Մնացածը արդարադատության գործն է: Սակայն նրանք 4 տարվա ընթացքում դատական գործընթացները չկարողացան ավարտին հասցնել: Ի վերջո, մարդասպանի դատական գործը փոխանցվեց անչափահասների դատարան: Մեզանից ինչ պահանջվում էր, արեցինք: Մնացածը պետք է դատարանից պահանջել:

Հիշեցնենք, որ պոլսահայ ականավոր գործիչ Հրանտ Դինքը սպանվել է 2007-ի հունվարի 19-ին Ստամբուլի Շիշլի թաղամասում գտնվող «Ագօս» թերթի խմբագրատան առջև: Նրա սպանության մեջ մեղադրվում է այն ժամանակ դեռ անչափահաս Օգյուն Սամասթը: Մեղադրանք է ներկայացվել նաև Սամասթին սպանության դրդած Յասին Հայալի և Էրհան Թունջելի դեմ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: