Ձեր վստահելի աղբյուրը

Եվրոպայի Խորհրդի Խորհրդարանական վեհաժողովի Բյուրոյի այսօր առավոտյան տեղի ունեցած նիստում ԼՂ հարցով ենթահանձնաժողովի աշխատանքների վերականգնման մասին որոշում է կայացվել: Այդ մասին Ստրասբուրգից Panorama.am-ին տեղեկացրեց ԵԽԽՎ հայաստանյան պատվիրակության անդամ Նաիրա Զոհրաբյանը` նշելով, որ քվեարկության ժամանակ դեմ եղել են միայն հայկական պատվիրակության անդամները:

Լիբերալների կուսակցությունը ներկայացնող կատալոնացի պատգամավոր Հորդի Խուկլա ի Կոստան (Jordi Xuclà i Costa) ընտրվել է ենթահանձնաժողովի նախագահ:

«Չավուշօղլուին հաջողվեց կենսագործել իր համար կենսական խնդիրներից մեկը` վերականգնել ԼՂ հարցով ենթահանձնաժողովի աշխատանքը», -մեկնաբանեց Նաիրա Զոհրաբյանը` տեղեկացնելով, որ նախօրեին հայկական պատվիրակության բոլոր անդամները նամակ են հղել Բյուրոյի անդամներին` նշելով, թե ինչու է անընդունելի նման հանձնաժողովի գործունեությունը ԵԽ շրջանակներում:

«Եվ նաև տեղեկացրել էինք նամակում, որ հայկական պատվիրակությունն անպատակահարմար է գտնում մասնակցել նման վարժանքներին», -հավելեց հայկական պատվիրակության անդամը:

Զոհրաբյանի փոխանցմամբ, Բյորոյի նիստում ընթացակարգային խախտում է տեղի ունեցել: «Մենք պահանջել էինք քարտուղարությունից հայկական պատվիարկության նամակը պաշտոնապես հանձնել Բյուրոյի անդամներին, որպեսզի նրանք այսօր քվեարկության ժամանակ ունենան մեր պարզաբանումներով ու վերապահումներով նամակը, սակայն քարտուղարությունը դա չի արել, ինչը մենք գնահատում ենք ընթացակարգային խախտում», -բացատրեց Զոհրաբյանը:

Նա նաև փոխանցեց, որ ԵԽԽՎ-ում հայկական պատվիրակության ղեկավար Դավիթ Հարությունյանը ելույթ է ունեցել Բյուրոյի նիստում և ներկայացրել հայկական կողմի հստակ տեսակետը` մեզ համար անընդունելի է մի գործընթաց, որը ուղղակիորեն կարող է խոչընդոտել ԵԱՀԿ Մինսկի խմբի գործունեությանը:

Զոհրաբյանի փոխանցմամբ ինքն անձամբ նախօրեին հանդիպել է Բյուրոյի անդամ Ֆրանսիայի ներկայացուցիչ Ժան Կլոդ Նինյոնի հետ և մնացել զարմացած: «Մինսկի խմբի անդամ երկրի ներկայացուցիչը ինձ հետ խոսելիս կիսեց հայկական կողմի մտահոգությունները, ասել, որ Մինսկի խմբին զուգահեռ գործընթացները անընդունելի են և խոստացավ, որ Բյուրոյում այդ մասին անպայմանորեն կբարձրաձայնի, բայց այսօր Բյուրոյի նիստում որևէ ծպտուն չի հանել», փոխանցեց Զոհրաբյանը` նկատելով, որ համանախագահ երկիր Ֆրանսիան այդ ուղղությամբ մտորելու բան ունի:

ԼՂ հարցով ենթահանձնաժողովի նախագահ Հորդի Խուկլա ի Կոստայի հետ Նաիրա Զոհրաբյանը չի կարողացել հանդիպել`հարցադրումներ ուղղելու և հասկանալու արդյոք այս հարցում կատալոնացի պատգամավորն ունի շահերի բախում:

ԵԽԽՎ-ում հայկական պատվիրակության հետագա անելիքների մասին Զոհրաբյանը չմանրամասնեց և ասաց, որ Հայաստան գալուց հետո պատվիրակությունը քաղաքական ուժերի հետ կքննարկի այդ խնդիրը և համապատասխան հայտարարություն կանի: