Ձեր վստահելի աղբյուրը

ՀՀ նախագահ Սերժ Սարգսյանն այսօր մասնակցել է Երևանի պետական համալսարանի (ԵՊՀ) խորհրդի նիստին, որի օրակարգում նոր ձևավորված խորհրդի կողմից խորհրդի նախագահի և քարտուղարի ընտրությունն էր:

Նիստի մասնակիցների կողմից ԵՊՀ խորհրդի նախագահի պաշտոնում առաջադրվել է Նախագահ Սերժ Սարգսյանի թեկնածությունը: Խորհրդի քվեարկության արդյունքում Սերժ Սարգսյանը վերընտրվել է Երևանի պետական համալսարանի խորհրդի նախագահ: Խորհրդի քարտուղար է ընտրվել Դավիթ Հայրապետյանը:

ԵՊՀ բանասիրական ֆակուլտետի դեկան Արծրուն Ավագյանի խոսքով, ԵՊՀ կառավարման խորհրդի նախագահի պաշտոնում երկրի ղեկավարի ընտրությունը շատ էական նշանակություն ունի այն առումով, որ գործ ունեն մի մարդու հետ, ով շատ լավ գիտի հանրապետությունը, կրթական համակարգը, մի մարդ, որ անցել է նորանկախ հանրապետության ամբողջ դժվարին ճանապարհը, լավատեղյակ է երկրի հոգս ու ցավերին:

«Հավատացած եմ, որ նա, համալսարանի հետ համագործակցելով, կարող է մի շարք շատ հրատապ խնդիրներ առաջիկայում լուծել: Մասնավորապես, ես նկատի ունեմ գիտության զարգացումը, նոր սերնդի դաստիարակությունը և երկրի առջև դրված այլ խնդիրներ»,-ասաց Ա. Ավագյանը:
Արևելագիտության ֆակուլտետի դեկան Գուրգեն Մելիքյանը նկատեց, որ ԵՊՀ խորհրդի նախագահի պաշտոնում երկրի ղեկավարի ընտրվելն իրենց ավելի է պարտավորեցնում:

«Մենք պետք է կարողանանք այդ ծանր բեռը տանել, որպեսզի հայրենիքին սատար կանգնենք»,-ասաց խորհրդի անդամ Մելիքյանը:

Երկրաբանության և աշխարհագրության ֆակուլտետի դեկան Մարատ Գրիգորյանի խոսքով, համալսարանականների համար դա պատիվ է ու հնարավորություն Ս. Սարգսյանի հետ անմիջական շփման, նրան անձամբ խնդիրների ներկայացման ու քննարկման համար: Նա հիշեցրեց, որ ԵՊՀ-ն միշտ էլ իր ազդեցությունն է ունեցել երկրի հասարակական-քաղաքական մտքի ձևավորման վրա, «մենք հնարավորություն կունենանք հասարակության, երկրի զարգացման, անվտանգություն ու հասարակությանը հուզող այլ հարցերի վերաբերյալ մեր կարծիքը ներկայացնել հանրապետության նախագահին»:

ԵՊՀ ուսխորհրդի նախագահ Ցոլակ Ակոպյանն իր հերթին նշեց, որ ուսխորհրդի կողմից Սերժ Սարգսյանի թեկնածության աջակցությունը հիմնավոր պատճառներ ունի: «Սերժ Սարգսյանը, լինելով համալսարանական, քաջատեղյակ է համալսարանի խնդիրներին: Երևի քիչ կան նման մարդիկ, որոնք բավականին մանրամասն գիտեն ԵՊՀ խնդիրները»,-ասաց նա, ավելացնելով, որ նախորդ տարիների ընթացքում Ս. Սարգսյանը միշտ աջակցել է ուսանողների նախաձեռնություններին, ուշադրության կենտրոնում պահել խնդիրները:

Նշենք, որ ԵՊՀ խորհուրդն ուսումնական հաuտատության կոլեգիալ կառավարման մարմինն է, որը, ԵՊՀ կանոնադրությանը համապատաuխան, գումարվում է 5 տարի ժամկետով: ԵՊՀ խորհուրդը քննարկում և հաuտատում է ԵՊՀ բյուջեն, ԵՊՀ զարգացման ռազմավարական ծրագրերը, լuում և գնահատում է ԵՊՀ տարեկան գործունեության վերաբերյալ ռեկտորի հաշվետվությունը, ընտրում է ԵՊՀ ռեկտորին, քննարկում և uահմանված կարգով հիմնադրին է ներկայացնում առաջարկություն ԵՊՀ կանոնադրության կամ դրանում փոփոխություններ ու լրացումներ կատարելու վերաբերյալ, հաuտատում է իր աշխատակարգը, ռեկտորի ընտրությունների ընթացակարգը:

ԵՊՀ խորհուրդը ձևավորվում է բարձրագույն ուսումնական հաստատության պրոֆեսորադասախոսական կազմի, սովորողների (ուսանողներ և ասպիրանտներ), ինչպես նաև հիմնադրի (ՀՀ կառավարություն) ու լիազորված մարմնի (ՀՀ կրթության և գիտության նախարարություն) ներկայացուցիչներից:
ԵՊՀ խորհուրդը կազմված է 70 անդամից: ԵՊՀ ռեկտորը չի կարող լինել ԵՊՀ խորհրդի անդամ: Նա խորհրդի նիստերին կարող է մասնակցել խորհրդակցական ձայնի իրավունքով:
Ս. Սարգսյանը խորհրդի նախագահ է ընտրվում երկրորդ անգամ: