Առաջին ՄԻՊ-ը չի կարող համակերպվել երկրորդի մի բացթողման հետ
«Այն, որ մենք այսօր չունենք Մարդու իրավունքների պաշտպան, դա Սահմանդրության 18-րդ կետի խախտում է: Ես դա ուղղակի անարգանք եմ համարում մարդու իրավունքների պաշտպանության հաստատության նկատմամբ իշխանության կողմից, ի վերջո դա իշխանության խնդիրն էր»,-այսօր լրագրողների հետ հանդիպմանը նման հայտարարությամբ հանդես եկավ «Ժառանգություն» խմբակցության անդամ, ՀՀ առաջին ՄԻՊ Լարիսա Ալավերդյանը:
Հիշեցնենք, որ փետրվարի 1-ին Մարդու իրավունքների պաշտպան Արմեն Հարությունյանը հրաժարականի դիմում է ներկայացրել ԱԺ նախագահ Հովիկ Աբրահամյանին: Առաջիկա շաբաթվա ընթացքում խորհրդարանի աշխատանքներն սկսելուն պես, ԱԺ նախագահը կհայտարարի այդ մասին և պաշտպանը հայտարարելուց երեք օր հետո կհաստատի իր հրաժարականը: Ա. Հարությունյանը ստանձնելու է Կենտրոնական Ասիայում ՄԱԿ-ի մարդու իրավունքների գլխավոր հանձնակատարի տարածաշրջանային ներկայացուցչի պաշտոնը:
Լ. Ալավերդյանի խոսքով, իշխանությունը պարտավոր էր ինչ-որ ձևով պարտադրել պաշտպանին շարունակել իր գործունեությունը մի քանի օր ևս, մինչև առաջիկա նիստում կընտրվեր նոր պաշտպան:
Այսօր թափուր մնացած ՄԻՊ պաշտոնի համար, ըստ բանախոսի, արժանի թեկնածուներ շատ կան հատկապես հասարակական սեկտորում, ովքեր կարող են ավելի համարձակ լինել, ինքնուրույն ու անկաշկանդ: «Ես գտնում եմ, որ Հայաստանում, ի դեպ ավելի քան Վրաստանում ու Ադրբեջանում, մենք մարդու իրավունքները պաշտպանող կազմակերպությունների ակտիվության ու գրագիտության առումով պարծենալու բան ունենք»,-ասաց նախկին պաշտպանը, միաժամանակ մտավախություն հայտնելով, որ պաշտպանի պաշտոնում կարող է ընտրվել մեկը, ով ավելի պասիվ դիրքորոշում կունենա մարդու իրավունքների պաշտպանություն ոլորտում առկա արդիկան խնդիրների նկատմամբ ու ենթարկվող կլինի:
«Ահա սա է իմ անհանգստությունը»,-ասաց նա, հիշեցնելով, որ երկրորդ պաշտպանը այդպես էլ չօգտագործեց «քաղբանտարկյալ» տերմինը, թողնելով դա դատական իշխանության վրա: «Ես կարծում եմ, որ դա անտեղի զիջումներից մեկն է»,-նկատեց օրենդիր մարմնի անդամն ու ընդգծեց, որ չի կարողանում դրա հետ համակերպվել, չնայած շատ բարձր է գնահատում Արմեն Հարությունյանի իրավական գիտելիքները, մեկը մյուսից հետևից բավականին հստակ ձևակերպված զեկույցները: Նրա խոսքով, Ա. Հարությունյանի պաշտոնավարման ընթացքում ամենևին էլ այդ կառույցին հարված չի հասցվել, ինչպես պնդում են ոմանք:
Նա նաև հայտարարեց, որ Հայաստանում մարդու իրավունքների պաշտպանության առումով իրավիճակը տխուր է:
Նշենք, որ Հայաստանի Սահմանադրությամբ Մարդու իրավունքների նոր պաշտպանի թեկնածությունը պետք է առաջարկի նախագահ Սերժ Սարգսյանը` խորհրդակցելով ԱԺ-ի հետ: Թեկնածուն պետք է առաջադրվի պատգամավորների առնվազն 1/5-րդի կողմից: Պաշտպանին 6 տարի ժամկետով ընտրում է Ազգային ժողովը պատգամավորների ընդհանուր թվի ձայների առնվազն 3/5-րդով: Այս պաշտոնում կարող է ընտրվել 25 տարին լրացած, հասարակության մեջ բարձր հեղինակություն վայելող, վերջին 5 տարում Հայաստանի Հանրապետության քաղաքացի հադիսացող և մշտապես բնակվող, ընտրական իրավունք ունեցող յուրաքանչյուր ոք:
