Ձեր վստահելի աղբյուրը

«Պետությունը ստանձնել է մի պարտավորություն, որը դժվար կարողանա իրականացնել»,- անդրադառնալով «Կրթության որակ և համապատասխանություն» երկրորդ վարկային ծրագրին, որ այս օրերին գտնվում է կրթության ոլորտի, ինչպես նաև բանկային համակարգի պատասխանատուների ու միջազգային փորձագետների ուշադրության կենտրոնում, Panorama.am-ի հետ զրույցում նշեց «Ժառանգություն» խմբակցության անդամ Անահիտ Բախշյանը:

Խոսելով ծրագրի մասին տիկին Բախշյանը շեշտադրեց դրա մի քանի կոմպոնենտներ` մասնավորապես` թե ինչպե՞ս պետությունը կֆինանսավորի կրթությունը, ինչպե՞ս կբաշխվեն ուսանողական վարկերը և այլն,  ու ընդգծեց, որ այն, այո, թեև բավականին կարևոր է մեր պետության համար ու իրատեսական: Բայց. «Այս պահին կան լուրջ խոչընդոտներ դրա իրականացման համար ու սա միայն իմ կարծիքը չէ, այլև առանձին փորձագետների»,- շեշտեց պատգամավորը:

Հղում անելով վերջիններիս, Ա.Բախշյանն ընդգծեց հիմնական խոչընդոտող հանգամանքները: Դրանք են` կոռուպցիան ու ամենակարևորը` կրթական ոլորտի չափից շատ քաղաքականացված վիճակը,  դրա հետ համաձայն է նաև ինքը, եթե վարկային այս ծրագիրը ևս քաղաքականացվի, ապա սա կնշանակի միայն մեկ բան` կրթական ոլորտում նախատեսված բարեփոխումների տապալում:

Այնպես որ, համոզմունք հայտնեց մեր զրուցակիցը, պետությունը ստանձնել է մի պարտավորություն, որը չի կարողանալու հաղթահարել, ընդ որում ընդդիմության ներկայացուցչի այս համոզման հետ համաձայն է նաև ՀՀ ֆինանսների նախարարությունը (գերատեսչության ներկայացուցիչն այդ մասին նշեց քննարկման ժամանակ իր ելույթում):

Ակնհայտ է, որ առաջ է քաշվում մեկ խնդիր ևս. ինչպե՞ս պետք է վերոհիշյալը լուծվի և ինչպե՞ս պետք է շարունակվի ծրագրի մեխանիզմների ներդրումը, չէ՞ որ արդեն տարուց ավելի այն գործարկվում է և դեռ երեք տարի կա մինչ դրա ավարտը.
«Այս պահին դժվար է ասել, քանի որ ամենուրեք նշված է կրթության ցածր մակարդակի մասին»,- արձագանքեց հարցադրմանն Ա.Բախշյանը ու ավելացրեց, որ կոնկրետ բարձրագույն կրթության ցածր մակարդակն է թիվ մեկ խոչընդոտող հանգամանքը, որ թույլ չի տա, փաստորեն, ապահովել ծրագրի իրականացմանը, քանզի վարկի տրամադրման առաջին իսկ չափորոշիչը հենց դա է նշված:
Իսկ որ Հայաստանում բարձրագույն կրթության ցածր որակի հետ գործ ունենք չի ժխտում ոլորտի որևէ ներկայացուցիչ:

Մի խոսքով, ընդդիմադիր պատգամավորն այն կարծիքին է, որ քաղաքականացված կրթական համակարգը դեռ երկար ժամանակ կխանգարի ոլորտի բարեփոխումների կյանքի կոչմանը. «Պարզ օրինակ` բուհը պետք է լինի ինքնավար, մինչդեռ գաղտնիք չէ, որ մեր բուհերը` բոլորն առանց բացառության, քաղաքականացված են. դրանց խորհրդի նախագահները երկրի ղեկավարությունն է` ՀՀ նախագահ, վարչապետ, ԱԺ փոխխոսնակ, նախարար և այլն»,- հիշեցրեց մեր զրուցակիցը:

Ի դեպ, այս հանգամանքը բավականաչափ հետաքրքրեց քննարկմանը ներկա միջազգային փորձագետին, որն իր զարմանքն արտահայտեց հարցադրման մեջ` «ինչո՞ւ պետք է վերոհիշյալ անձինք լինեն խորհրդի նախագահ, միթե՞ նրանք այդքան ժամանակ ունեն»:

Իսկ արդեն իր անունից Ա.Բախշյանն ասաց` եթե լինելով բուհերի ղեկավարներ և փաստացի ունենք կրթության նման որակ, արդյո՞ք դա չի նշանակում, որ մեր ղեկավարներն ակնհայտ իրենց տեղում չեն: Հաջորդիվ` վարկային ծրագրի միջոցներն էլ, մտավախություն ունի, կբաշխվեն կուսակցական պատկանելությամբ ուսանողների միջև: Ենթադրեց. «Ասենք` ուսանողական վարկի դիմաց ուսանողին կարող են պարտադրել համալրել տվյալ կուսակցության շարքերը»:

Մի խոսքով, սրանք են մեր զրուցակցի մտավախությունները` կապված երկրորդ վարկային ծրագրի տրամադրման ու ներդրման հետ:

Հիշեցնենք, որ վարկային ծրագիրը մեկնարկել է 2009-ի վերջին, ավարտը նախատեսված է 2014թ-ին, իսկ գումարայինը հավասար է 31.26 մլն ԱՄՆ դոլարին: